Małdova i Ukraina pa pamiery minimalnaj zarpłaty abahnali Biełaruś u 2019 hodzie. A ŭ susiednich z nami krainach Jeŭrasajuza minimalny zarobak značna bolšy, čym u Biełarusi — siaredni.
Z 1 studzienia ŭ Biełarusi minimalny zarobak vyras da 400 rubloŭ. Heta za vylikam padachodnaha padatku składaje ŭ ekvivalencie 110 jeŭra.
Dla paraŭnańnia: va Ukrainie minimalny zarobak ciapier čystymi 142 jeŭra, u Małdovie — 119.
A ŭ tych krainach, jakija ŭziali kurs na Jeŭrasajuz jašče ad 1990-ch, zarobki našmat vyšejšyja, čym u nas. U Polščy minimalny zarobak čystymi składaje 442 jeŭra, u Litvie — 468, u Łatvii — 418, u Estonii — 546. Navat u niekali najbiadniejšaj Ałbanii jon składaje 246 jeŭra — u dva z hakam razy bolš, čym u Biełarusi.
Minimalny zarobak vyznačajecca dziaržavaj z metaj abarony samych biednych słajoŭ nasielnictva, ludziej, zaniatych u niekvalifikavanaj pracy. U niekatorych krainach jon ustanoŭleny pahadzinna, u inšych — pamiesiačna.
U Niamieččynie minimalny zarobak čystymi składaje 1221 jeŭra za miesiac, u Rasii — 120.
Realnyja dachody nasielnictva ŭ roznych krainach supastaŭlać ciažka, bo jany zaležać nie tolki ad pamieru zarobkaŭ, ale i ŭzroŭniu cen i dziaržaŭnych subsidyj. Akramia taho, u krainach z bolšaj dolaj pryvatnaha siektaru zarobki składajuć mienšuju dolu ŭ dachodach, a dachody ad biznesu, akcyj, ziamli, zdačy ŭ arendu — bolšuju.
Kamientary