BiełTA
— Ja piareču suprać parušeńnia prava na abaronu Babaryki abvieščanym abvinavačvańniem, jakoje nie adpaviadaje patrabavańniam č. 1 art. 241 KPK Respubliki Biełaruś, a mienavita, nie ŭtrymlivaje apisańnia inkryminavanych dziejańniaŭ z ukazańniem času, miesca, sposabu, inšych abstavin ich ździajśnieńnia, jakija ŭvachodziać u pradmiet dakazvańnia ŭ adpaviednaści z art.89 KPK.
Najaŭnaje ŭ abvinavačvańni apisańnie nie dazvalaje ŭ dastatkovaj stupieni zrazumieć, u jakich mienavita dziejańniach abvinavačanaha Viktara Babaryki ŭhledžanaje złačynstva, zajaviŭ Łajeŭski.
Tak, u častcy abvinavačvańnia ŭ atrymańni chabaru (č. 3 art. 430 KK) śćviardžajecca, što Babaryka sumiesna ź inšymi abvinavačanymi pryniali ŭ niekalki etapaŭ z rachunkaŭ biełaruskich subjektaŭ haspadarańnia hrašovyja srodki ŭ formie bieznajaŭnych pieravodaŭ «pad vyhladam udziełu ŭ raźmierkavańni prybytku» na «padkantrolnyja kiraŭniku arhanizavanaj złačynnaj hrupy» rachunki zamiežnych kampanij, zarehistravanych u Łatvii. Takimi nibyta «padkantrolnymi kampanijami» ŭ abvinavačvańni nazvanyja SIA ALTIJAS INVESTICIJU GRUPA», SIA «LATVIJAS INVESTICIJU AGENTURA «AUSTRUMU TILTS», AS «MBC INVESTMENT».
Tak apisany sposab nibyta atrymańnia chabaru.
Razam z tym, z abvinavačvańnia nie jasna i ŭ abvinavačvańni nasupierak art. 241 KPK nie paznačana:
— u siłu jakoj normy prava zakonnaje raźmierkavańnie prybytku ad biełaruskaha subjekta haspadarańnia svajmu zamiežnamu zasnavalniku nazvana ŭ abvinavačvańni «niezakonnaj hrašovaj uznaharodaj»;
— u čym vyjaŭlałasia tak zvanaja «padkantrolnaść» zamiežnych kampanij Babaryku, jaki źmiest układajecca ŭ słova «padkantrolnaść» i, kali takoje paniaćcie nie praduhledžana zakanadaŭstvam, to na jakoj padstavie ŭ abvinavačvańni z hetym paniaćciem źviazvajucca niejkija vysnovy i jurydyčnyja nastupstvy;
— jakim čynam pastupleńnie hrošaj pry raźmierkavańni prybytku (dyvidendaŭ) ad biełaruskaha subjekta haspadarańnia da zamiežnaj jurydyčnaj asoby (zasnavalnika) moža pryvieści da pryniaćcia hramadzianinam Babarykam niejkich hrošaj, bo jany pastupili zamiežnaj jurydyčnaj asobie, u jakoj jość svaje zasnavalniki i kiraŭniki;
— kali, dzie i jakim čynam hrošy, jakija pastupili ad biełaruskaj jurydyčnaj asoby da zamiežnaj jurydyčnaj asoby, byli pryniatyja ŭ niepasrednaje asabistaje vałodańnie Viktaram Babarykam, jaki nie źjaŭlaŭsia ni zasnavalnikam, ni kiraŭnikom hetaj zamiežnaj jurydyčnaj asoby i mahčymaści karystacca hetymi hrašyma jak svaimi nie mieŭ;
— jakija kankretna dziejańni asabista Babaryki byli abumoŭlenyja chabaram, kali im hetyja dziejańni ździejśnienyja i što majuć na ŭvazie pad «inšymi rašeńniami praŭleńnia» ŭ intaresach TAA «Aktyŭlizinh» i TAA «PryvatLizinh».
Taksama ŭ abvinavačvańni nie paznačany kankretny čas (daty) i sumy, jakija ŭ hetyja daty nibyta pieradadzienyja Babaryku ŭ najaŭnaj formie, kali jon asabista ich pryniaŭ u svaju ŭłasnaść, jakija mienavita dziejańni suprać intaresaŭ słužby za ich ździejśniŭ, zajaviŭ Łajeŭski.
Taksama ŭ abvinavačvańni nie paznačana, kali (daty) i šlacham jakich kankretna dziejańniaŭ Babaryka nibyta arhanizavaŭ raźmierkavańnie chabaraŭ.
U častcy abvinavačvańnia ŭ lehalizacyi srodkaŭ, zdabytych złačynnym šlacham (č. 2 art. 235 KK), śćviardžajecca ab tym, što Babaryka arhanizavaŭ pieralik hrašovych srodkaŭ z rachunku SIA «LATVIJAS INVESTICIJU AGENTURA «AUSTRUMU TILTS» na rachunki TAA «PryvatLizinh» i TAA «Sistemy apracoŭki infarmacyi» pa damovach pazyki, i nibyta ŭ jakaści pazyki padavalisia srodki, atrymanyja zahadzia złačynnym šlacham.
Razam z tym, z abvinavačvańnia nie jasna i ŭ abvinavačvańni nasupierak art. 241 KPK nie paznačana:
— jakija mienavita ź pieraličanych abvinavačvańniem finansavych apieracyj rascenienyja jak lehalizacyja;
— jakaja mienavita suma hrašovych srodkaŭ była nibyta lehalizavanaja;
— zychodziačy z čaho srodki zamiežnaj kampanii SIA «LATVIJAS INVESTICIJU AGENTURA» AUSTRUMU TILTS « rascenienyja jak srodki, atrymanyja złačynnym šlacham, Kali krynicy farmiravańnia majomaści hetaj arhanizacyi nijak nie praviaralisia.
— Pakolki vysnovy śledstva nosiać abstraktny charaktar, to ŭ suviazi z hetym Viktar Babaryka pazbaŭleny mahčymaści asprečvać inkryminavanyja dziejańni, bo jany naležnym čynam nie sfarmulavanyja, a tamu parušajecca jaho prava na abaronu. Chadajnictvy abarony, padadzienyja na śledstvie, u jakich havaryłasia ab nieabchodnaści kankretyzacyi abvinavačvańnia, nie zadavolenyja, — arhumientavaŭ Łajeŭski.
Akramia taho, pry vyznačeńni paradku daśledavańnia dokazaŭ abvinavačvańnie prapanavała nastupny paradak: dapytać abvinavačanych, siarod jakich u apošniuju čarhu — Babaryku, potym śviedak, potym daśledavać piśmovyja matryjały spravy. Abaroncy Babaryki i jon sam prapanavali pačać dopyt abvinavačanych z dopytu Babaryki, pakolki jon abvinavačvajecca ŭ stvareńni arhanizavanaj złačynnaj hrupy, raniej pakazańni nie davaŭ, ciapier u sudzie žadaje dać pakazańni. Praktyčna ŭsie advakaty inšych abvinavačanych padtrymali toj paradak, jaki byŭ prapanavany abaronaj Babaryki.
Sud vyznačyli paradak daśledavańnia dokazaŭ u adpaviednaści z prapanovaj dziaržabvinavačvańnia.
