Žaleznyja dźviery ofisu abłasnoj arhanizacyi Biełaruskaj sacyjał-demakratyčnaj partyi «Hramada» vyłamanyja, a skroź adtuliny bačna, što ŭnutry byŭ pieratrus. Bolš za hadzinu tamu la ofisu było šmat milicyjantaŭ, piša «Radyjo Svaboda».
Pavodle vidavočcaŭ, na aknie siadziby partyjnaj arhanizacyi visieŭ bieł-čyrvona-bieły ściah, jaki pryciahnuŭ uvahu supracoŭnikaŭ milicyi.
Siadziba mahiloŭskich sacyjał-demakrataŭ mieścicca ŭ centry horadu na piešachodnaj vulicy Leninskaj. Vokny vychodziać u prachadny padvorak. Partyjcy kažuć, što ściah visieŭ na aknie bolš za hod i prablemaŭ, źviazanych ź im, nie było. Akramia jaho, pa ścienach pamiaškańnia byli raźviešanyja partyjnyja ściahi. Ciapier ich niama.
22 sakavika na 15 dzion administracyjnaha aryštu asudzili staršyniu Biełaruskaj sacyjał-demakratyčnaj partyi (Hramada) Ihara Barysava. Nibyta jon nie padparadkavaŭsia «zakonnamu patrabavańniu słužbovaj asoby». BSDP (Hramada) razam z Partyjaj BNF i rucham «Za Svabodu» padavali ŭ Mienharvykankam zajaŭku na praviadzieńnie šeścia i mitynhu z nahody 103-j hadaviny abviaščeńnia niezaležnaści Biełaruskaj Narodnaj Respubliki. Staličnyja ŭłady dazvołu nie dali.
Nie dazvoliŭ harvykankam mitynh na 25 sakavika i ŭ Mahilovie. Pra heta zajaŭnik — aktyvist AHP Raman Davydaŭ — daviedaŭsia ad prakurora horadu. Ad čynoŭnikaŭ adkazu na zajaŭku niama dahetul, choć jaje padavali na pačatku sakavika.
