Polskaje Upraŭleńnie hramadzianskaj avijacyi rasśleduje incydent z samalotam Ryanair u Biełarusi ŭ supracoŭnictvie z zamiežnymi partniorami. Pra heta zajaviŭ u aŭtorak u efiry Polskaha telebačańnia namieśnik ministra zamiežnych spraŭ Polščy Šyman Šynkoŭski viel Sienk, piša TASS.
«My robim ciapier dziejańni ŭ mižnarodnaj arhanizacyi hramadzianskaj avijacyi. Tam pavinna być praviedziena detalovaje rasśledavańnie, apytańnie piłotaŭ, kantraloraŭ, pa mahčymaści prasłuchoŭvańnie zapisaŭ», — skazaŭ jon.
Adkazvajučy na pytańnie, što Polšča moža zrabić, uličvajučy, što samalotam vałodaje polskaja kampanija, namieśnik ministra skazaŭ, što «polskaje ŭpraŭleńnie hramadzianskaj avijacyi pravodzić pa hetaj spravie detalovaje rasśledavańnie ŭ supracoŭnictvie ź Mižnarodnaj arhanizacyjaj hramadzianskaj avijacyi».
«Mnohaje ŭžo viadoma, ale jašče nie ŭsio. Prajšło tolki 48 hadzin z momantu zdareńnia. Nie ŭsie zacikaŭlenyja ŭ tym, kab niekatoraja infarmacyja była apublikavanaja. Tut treba detalovaje rasśledavańnie», — adznačyŭ jon, śćviardžajučy, što «tłumačeńni biełaruskaha boku nie zasłuhoŭvajuć davieru».
«Čykahskaja kanviencyja (Kanviencyja ab mižnarodnaj hramadzianskaj avijacyi) daje nam peŭnyja instrumienty dla dziejnaści, ale hetaja ž kanviencyja dazvalaje luboj krainie patrabavać tłumačeńniaŭ, čamu jana była parušanaja. Normy kažuć pra toje, što asabliva zakranutyja krainy, a Polšča moža siabie takoj ličyć, majuć peŭnyja pravy, i my budziem ich vykarystoŭvać», — skazaŭ na zakančeńnie jon.
