«Jon sustrakaŭsia ź dziaŭčynaj, jany stroili płany»
Jahor Dudnikaŭ žyvie ŭ Minsku ŭžo kala hoda. Jak raspaviadaje jaho maci, pryčynaj pierajezdu jaje syna ŭ inšuju krainu stali ramantyčnyja stasunki ź biełaruskaj, ź jakoj paznajomiŭsia jašče ŭ 16 hadoŭ. U Rasii chłopiec skončyŭ navučańnie na kuchara i źjechaŭ u Minsk. U biełaruskaj stalicy jon zdymaŭ kvateru, stroiŭ adnosiny ź dziaŭčynaj i zarablaŭ na žyćcio na roznych pracach.
«Na žal, pracavać kucharam u jaho nie atrymałasia ŭ Minsku. I tak jak u jaho vielmi pryhožy hołas, to jon staŭ ahučvać multfilmy, anime, hulni, rekłamnyja roliki. Voś tak jon zarablaŭ hołasam. Taksama jon apracoŭvaŭ teksty, padpracoŭvaŭ redaktaram, a časam i hruzčykam. Asnoŭnaj metaj hetaha było znachodžańnie ŭ Minsku, bo jon sustrakaŭsia ź dziaŭčynaj, jany stroili płany», — raspaviadaje historyju pierajezdu syna Julija.
«Nie dumała, što najaŭnaść mikrafona moža być padstavaj dla zatrymańnia»
5 traŭnia Jahor Dudnikaŭ pravioŭ dziaŭčynu da doma i viartaŭsia na zdymnuju kvateru. Pa darozie jon patelefanavaŭ maci i skazaŭ, što jon pobač z domam i paźniej pieratelefanuje joj. Ale paśla hetaha jon źnik ź sietki. Maci, nie dačakaŭšysia zvanka, sprabavała datelefanavacca da jaho ŭsiu noč. Na nastupny dzień jana daviedałasia, što Jahora zatrymali kala doma, a ŭ jaho pakoi na zdymnaj kvatery praviali pieratrus. Pa słovach maci chłopca, paśla pieratrusu ŭ jaho kanfiskavali tolki mikrafon.
«Kali ščyra, ja nie dumała, što najaŭnaść mikrafona moža być dastatkovaj padstavaj dla zatrymańnia. Asabliva, uličvajučy, što čałaviek zajmajecca apracoŭkaj aŭdyja», — kaža maci Jahora.
Pa słovach Julii, dvoje sutak jana i dziaŭčyna Jahora ničoha pra jaho nie viedali: ni miescaznachodžańnia, ni pryčyny zatrymańnia. Va ŭsich RUUS im adkazvali, što čałavieka z proźviščam Dudnikaŭ u ich niama. Tady mama Jahora vyrašyła sama prylacieć u Minsk. Dziažurny advakat Jahora paviedamiŭ joj, što jaje syna trymajuć u SIZA KDB i jamu pradjaŭlajuć abvinavačańnie pa č. 1 art. 342 KK — arhanizacyja hrupavych dziejańniaŭ, jakija hruba parušajuć hramadski paradak i spałučanych ź vidavočnym niepadparadkavańniem zakonnym patrabavańniam pradstaŭnikoŭ ułady, što paciahnuła parušeńnie pracy transpartu i pradpryjemstvaŭ.
«Usio praciata niejkim adčajem, što ŭsio zrujnavałasia na pustym miescy»
Jak raspaviadaje Julija, da Jahora nie puskajuć advakata ŭžo dva tydni.
«Ja da hetaha času nie viedaju dakładna, što jamu pradjaŭlajuć, jakija dokazy jość suprać jaho… Ničoha nie viedaju. Tolki adzin list pryjšoŭ ad jaho, choć my jamu ŭžo, napeŭna, dziasiatak adpravili. Jon piša, jak sumuje pa nam i jak škaduje, što dastaviŭ nam stolki zasmučeńniaŭ. Tamu što jon realna razumieje, što my ŭsie tut šalejem ad pieražyvańnia za jaho. Dziaŭčynie jon piša, što sumuje i kachaje jaje. Jon spadziajecca, što dalejšyja płany buduć u ich usio ž sumiesnyja… Jon piša, ale ŭsio prasiaknuta niejkim adčajem, niavykrutkaj ad taho, što ŭsio zrujnavałasia na pustym miescy», — adznačaje Julija.
«Jon zakachany 20-hadovy chłapčuk, ale nijak nie arhanizatar, nie padrychtoviec paŭstańniaŭ»
Mamie Jahora viadoma, što za hety čas jaho dapytvali i zdymali na videakamieru. Jana aścierahajecca, što z-za cisku ŭ KDB i pry śledčych dziejańniach biez advakata chłopiec moža «nahavaryć lišniaha» suprać siabie:
«Jahoru ŭsiaho tolki 20 hadoŭ. Heta chłapčuk, jaki pryjechaŭ u Minsk, dla taho kab stroić adnosiny ź dziaŭčynaj. U jaho kachańnie i ramantyčnyja stasunki. I toje, što ciapier adbyvajecca, pa sutnaści, moža pierakreślić usio jaho dalejšaje žyćcio.
Jon kuchar, zajmaŭsia amatarskaj (nie prafiesijnaj) ahučkaj multykaŭ. Jon zakachany 20-hadovy chłapčuk, ale nijak nie arhanizatar, nie padrychtoviec paŭstańniaŭ.
Amal miesiac Jahor niezakonna i niespraviadliva znachodzicca ŭ SIZA KDB. Da jaho nie puskajuć advakata i ničoha nie paviedamlajuć navat svajakam. Kamunikujem tolki praź listy, jakija dachodziać da jaho praz raz. Ciapier jaho nieabhruntavana abvinavačvajuć pa artykule 342 KK, pa jakomu pahražaje termin da troch hadoŭ».
Jahora Dudnikava zatrymlivali ŭ kastryčniku minułaha hoda. Jak raspaviadaje jahonaja mama, tady jon zastupiŭsia za dzicia, jakoha chacieli zatrymać. Pa słovach Julii, jaje synu «atrymałasia paźbiehnuć aryštu, bo, kali jaho stali bić [supracoŭniki], jamu stała błaha z sercam». Jahora advieźli ŭ balnicu.
«Tady jon abyšoŭsia siniakami i niervovym stresam», — dadaje maci chłopca.
