Prezident maliŭsia kala ŭstalavanaha ŭ Zalašanach pomnika pakutnikam padlaskim i chełmskim. U Zalašany jon pryjechaŭ u kampanii kiraŭnika Polskaj pravasłaŭnaj carkvy — mitrapalita Savy. Potym uskłaŭ vianok.
Pierad hetym prezident naviedaŭ pravasłaŭny manastyr śviatych Marty i Maryi na Śviatoj Hary Hrabarcy. Tut jaho i vitaŭ mitrapalit Sava.
Andžej Duda taksama naviedaŭ II biełaruski licej u Bielsku Padlaskim, u jakim sustreŭsia z navučencami, vykładčykami i pradstaŭnikami biełaruskaj mienšaści.
Prezident nahadaŭ, što ŭ minułuju piatnicu sustrakaŭsia ź lidaram biełaruskaj apazicyi Śviatłanaj Cichanoŭskaj i pradstaŭnikami polskaj mienšaści ŭ Biełarusi. Padčas sustrečy abmierkavali ahulnaja situacyju ŭ Biełarusi i prablemy palakaŭ, jakija tam pražyvajuć.
«Na žal, ładzicca šmat akcyjaŭ, jakija skiravanyja na toje, kab pasvaryć našy hramadstvy. Kab pierasvaryć našy narody, ale ja chaču, kab my nie dapuścili hetaha, bo my razam hramadzianie adnoj Rečy Paspalitaj. Šukajucca roznyja mahčymaści, kab vyklikać kanflikt, naprykład, na histaryčnaj temie. Ja liču, što važnaj zadačaj prezidenta Respubliki Polšča źjaŭlajecca nie dapuścić hetaha i, pierš za ŭsio, być tut, prajaŭlać adzinstva, prajaŭlać supolnaść, prajaŭlać pavahu», — skazaŭ jon u biełaruskim licei.
Prezident taksama raspavioŭ, što naviedaŭ Zalašany, «miesca, jakoje adznačanaje pakutami i śmierciu biełarusaŭ, jakija žyli ŭ Rečy Paspalitaj, niavinnych žančyn i dziaciej».
«Ja maliŭsia tam za tych, chto zahinuŭ, uskłaŭ vianok jak Prezident Respubliki Polšča pad kryžam, jaki ŭšanoŭvaje pamiać achviaraŭ. Heta važna jak častka pašany i pamiaci. Heta važna ŭ najvažniejšym duchoŭnym aśpiekcie», — dadaŭ jon.
