Прэзідэнт Польшчы Анджэй Дуда наведаў Падляшша, каб сустрэцца з прадстаўнікамі беларускай меншасці ў Польшчы. Адным з пунктаў візіту было ўскладанне вянка да помніка жыхарам Заляшанаў, якіх забіла ў 1946 годзе антыкамуністычная дывізія пад камандаваннем Рамуальда Райса «Бурага», паведамляе «Белсат».
Прэзідэнт маліўся каля ўсталяванага ў Заляшанах помніка пакутнікам падляскім і хэлмскім. У Заляшаны ён прыехаў у кампаніі кіраўніка Польскай праваслаўнай царквы — мітрапаліта Савы. Потым усклаў вянок.
Перад гэтым прэзідэнт наведаў праваслаўны манастыр святых Марты і Марыі на Святой Гары Грабарцы. Тут яго і вітаў мітрапаліт Сава.
Анджэй Дуда таксама наведаў II беларускі ліцэй у Бельску Падляскім, у якім сустрэўся з навучэнцамі, выкладчыкамі і прадстаўнікамі беларускай меншасці.
Прэзідэнт нагадаў, што ў мінулую пятніцу сустракаўся з лідарам беларускай апазіцыі Святланай Ціханоўскай і прадстаўнікамі польскай меншасці ў Беларусі. Падчас сустрэчы абмеркавалі агульная сітуацыю ў Беларусі і праблемы палякаў, якія там пражываюць.
«На жаль, ладзіцца шмат акцыяў, якія скіраваныя на тое, каб пасварыць нашы грамадствы. Каб перасварыць нашы народы, але я хачу, каб мы не дапусцілі гэтага, бо мы разам грамадзяне адной Рэчы Паспалітай. Шукаюцца розныя магчымасці, каб выклікаць канфлікт, напрыклад, на гістарычнай тэме. Я лічу, што важнай задачай прэзідэнта Рэспублікі Польшча з’яўляецца не дапусціць гэтага і, перш за ўсё, быць тут, праяўляць адзінства, праяўляць супольнасць, праяўляць павагу», — сказаў ён у беларускім ліцэі.
Прэзідэнт таксама распавёў, што наведаў Заляшаны, «месца, якое адзначанае пакутамі і смерцю беларусаў, якія жылі ў Рэчы Паспалітай, нявінных жанчын і дзяцей».
«Я маліўся там за тых, хто загінуў, усклаў вянок як Прэзідэнт Рэспублікі Польшча пад крыжам, які ўшаноўвае памяць ахвяраў. Гэта важна як частка пашаны і памяці. Гэта важна ў найважнейшым духоўным аспекце», — дадаў ён.
Цяпер чытаюць
Беларусь ужо не толькі пра палітвязняў. З чым Святлана Ціханоўская паехала на адзін з галоўных форумаў па бяспецы ў ЗША і што там рабіў Сяргей Ціханоўскі2121
Каментары