Testy na antycieły musiać pakazać, ci raźviŭsia ŭ vašym arhaniźmie imunny adkaz paśla zaražeńnia karanavirusam.
Stanoŭčy vynik śviedčyć pra toje, što niadaŭna vy pierachvareli na kavid, navat kali simptomaŭ nijakich nie było.
Kali vynik admoŭny, to na dadzieny momant imunnaj achovy ad kavidu niama. Ale heta nie značyć, što vy nie chvareli na karanavirus. Antycieły mohuć prysutničać, ale ŭ zamałoj kolkaści, kab ich moh vyjavić test. Bolš za toje, dla vypracoŭki antycieł patrabujecca ad adnaho da troch tydniaŭ paśla zaražeńnia. A praź niekalki miesiacaŭ uzrovień antycieł moža znoŭ źnizicca nižej za paroh, jaki moža pakazać test na antycieły.
Što datyčycca postvakcynalnych antycieł, to zvyčajnyja testy, jak praviła, ich nie vyjaŭlajuć uvohule. Sprava ŭ tym, što bolšaść testaŭ raspracavanyja dla pošuku antycieł da białku karanavirusa, viadomaha jak nukleakapsid, ci prosta N. Paśla zaražeńnia karanavirusam u arhaniźmie vypracoŭvajecca mienavita hety typ antycieł.
Adnak takija antycieły nie zaŭsiody mohuć praduchilić virusnuju infiekcyju. Da taho ž, jany dziejničajuć u arhaniźmie niadoŭha, piša The New York Times.
Sučasnyja vakcyny dapamahajuć arhanizmu vypracavać antycieły da inšaha białku, viadomaha jak spajkavy. Jon znachodzicca na pavierchni virusa, i antycieły da jaho zabiaśpiečvajuć bolš efiektyŭnuju i doŭhuju achovu.
Kali čałaviek, jaki nikoli nie chvareŭ na karanavirus, vakcynujecca, a paśla robić test, to jon pakaža admoŭny vynik, bo ŭ arhaniźmie niama antycieł da białku N, ale, chutčej za ŭsio, jość antycieły da spajkavaha białku.
Dla hetych antycieł isnujuć asablivyja testy. U Biełarusi ich robiać łabaratoryi InVitro i Synevo.
