Epidemija była razburalnaj i praciahvałasia šmat hadoŭ, tamu ŭ DNK sučasnaha čałavieka možna znajści ślady hiennych mutacyj, piša The New York Times.
Virusy vyklikajuć značnyja źmieny ŭ hienomie čałavieka. Kali adna viersija hiena daminuje nad inšymi ŭ bolšaści pradstaŭnikoŭ peŭnaj hrupy ludziej, to navukoŭcy viedajuć, što heta, chutčej za ŭsio, prykmieta chutkaj evalucyi ŭ minułym.
U apošnija hady bijołah-evalucyjanist z Aryzonskaha ŭniviersiteta Devid Ernard i jaho kalehi daśledavali hienom čałavieka, kab adnavić historyju mnostva virusaŭ. Kali pačałasia pandemija karanavirusa, Ernard vyrašyŭ pravieryć, ci pakinuli staražytnyja karanavirusy svoj śled u hienomie čałavieka.
Navukoŭcy paraŭnali DNK tysiač ludziej z 26 roznych papulacyj va ŭsim śviecie. Kamanda vyvučała kambinacyi hienaŭ, jakija majuć vyrašalnaje značeńnie mienavita dla karanavirusaŭ. Padčas daśledavańnia hienomu žycharoŭ Uschodniaj Azii navukoŭcy vyjavili, što 42 hieny źjaŭlajucca daminantnymi. Heta dakazavaje toje, što ludzi ŭ rehijonie adaptavalisia da staražytnaha karanavirusa.
Pa acenkach daśledčykaŭ, hetyja hieny raźvili supraćvirusnyja mutacyi kala 20—25 tysiač hadoŭ tamu. Praces raźvićcia mutacyj byŭ doŭhim — jon moh dasiahać niekalkich stahodździaŭ.
Navukoŭcy paraŭnali hieny žycharoŭ hetaha rehijona z pradstaŭnikami inšych papulacyj i nie znajšli śladoŭ padobnych mutacyj. Tamu daśledčyki pryjšli da vysnovy, što pandemija achapiła tolki Uschodniuju Aziju.
Na dumku daśledčykaŭ, vyjaŭlenyja mutacyi, vyklikanyja staražytnym karanavirusam, mohuć być karysnymi ŭ baraćbie z kavidam.
