BDU
Samy vysoki konkurs u viadučym univiersitecie krainy — na śpiecyjalnaść «dyzajn» (napramak «kamunikatyŭny dyzajn»). Ažno 12 čałaviek na miesca.
Pa prachadnych bałach karcinka tradycyjnyja. Rekordnyja parohi — na fakultecie mižnarodnych adnosin. Kab pastupić na «linhvakrainaznaŭstva», sioleta patrabavałasia 384 bały (suma vynikaŭ CT pa troch pradmietach i siaredni bał atestata), na «mižnarodnaje prava» — 378, na «mižnarodnyja adnosiny» — 374.
Siarod pryrodaznaŭčych śpiecyjalnaściaŭ topavymi akazalisia «prykładnaja infarmatyka» (362 bały), «chimija lekavych złučeńniaŭ» (352 bały), «infarmatyka» (350 bałaŭ) i «bijachimija» (333 bały).
Darečy, amal čverć usich stabalnikaŭ pastupiła ŭ BDU.
BDUIR
U ajcišnaj VNU vialiki popyt na «čystaje» prahramavańnie i elektronnuju ekanomiku.
Składaniej za ŭsio pastupić na fakultet kampjutarnych sistem i sietak. Prachadny bał na śpiecyjalnaść «prahramnaje zabieśpiačeńnie infarmacyjnych technałohij» — 371, «infarmatyka i technałohii prahramavańnia» — 362. Na inšych fakultetach popytam najbolš karystałasia navučańnie na hulniavuju industryju (361 bał), infarmacyjnyja technałohii ŭ biznes-mieniedžmiencie i elektronny markietynh (pa 360 bałaŭ).
BDMU
U budučych miedykaŭ najbolš prestyžnym kirunkam zastajecca stamatałohija. Sioleta konkurs tam skłaŭ 2,2 čałavieki na miesca, a prachadny bał — 387. Kab biaspłatna navučacca na farmaceŭtycy, treba było nabrać 365 bałaŭ, na lačebnaj spravie — 357.
BNTU
Samy vysoki konkurs tut na architektara — 4,3 čałavieka na miesca. Pastupić na hetu śpiecyjalnaść možna było z 338 bałami.
Siarod topavych kirunkaŭ taksama markietynh (prachadny bał — 346), ekanomika i kiravańnie na pradpryjemstvie (336), transpartnaja łahistyka (334). Pierśpiektyŭnymi abituryjenty taksama paličyli śpiecyjalnaści «prahramnaje zabieśpiačeńnie i infarmacyjnyja technałohii» i «mytnaja sprava» (i tam, i tam dla pastupleńnia treba było nabrać 331 bał).
BDEU
U ekanamičnym univiersitecie niečakana zdaryŭsia napłyŭ u dziaržaŭnyja kiraŭniki — 3,2 čałavieka na miesca. U papiarednija hady konkurs byŭ udvaja mienšy.
Pa bałach samy vysoki paroh — na źniešnieekanamičnyja suviazi (361 bał). Abituryjenty z dobrymi vynikami CT išli taksama na biznes-administravańnie (348 bałaŭ), suśvietnuju ekanomiku i palitałohiju (pa 340 bałaŭ).
Što ŭ rehijonach?
U Hrodzienskim dziaržaŭnym univiersitecie imia Janki Kupały samaj zapatrabavanaj śpiecyjalnaściu staŭ «mižnarodny turyzm» — 354 bały. Z vysokimi bałami pastupali na pravaznaŭstva (329), niamieckuju fiłałohiju (328) i kiravańnie infarmacyjnymi resursami (322). A najbolšy konkurs skłaŭsia siarod budučych dyzajnieraŭ — 8,2 čałavieka na miesca.
Napłyŭ achvotnych vučycca pravaznaŭstvu naziraŭsia ŭ Homielskim dziaržaŭnym univiersitecie imia Francyska Skaryny. Konkurs na hetu śpiecyjalnaść — 6,2 čałavieka na miesca, prachadny bał — 335. Taksama popytam karystalisia kirunki «biznes-administravańnie» (330 bałaŭ), «mižnarodny turyzm» (328 bałaŭ) i «ekanamičnaja infarmatyka» (322 bały).
Łahapied — heta prafiesija akazałasia ŭ topie siarod abituryjentaŭ Bresckaha dziaržaŭnaha ŭniviersiteta imia Puškina. Na miesca tam pretendavała šeść čałaviek, a dla pastupleńnia nieabchodna było 310 bałaŭ. Vysoki prachadny bał naziraŭsia na palitałohii (316), kampjutarnaj linhvistycy (314) i historyi i hramadaznaŭstvie (307).
Moładź, jakaja išła ŭ Viciebski dziaržaŭny ŭniviersitet imia Mašerava, abirała prafiesii jurystaŭ i prahramistaŭ. Konkurs na mižnarodnaje prava skłaŭ 6,3 čałavieka na miesca, na prahramnaje zabieśpiačeńnie — 5,8, na źniešnieekanamičnyja suviazi — 3,4.
