Kali vyvučyć ličby bolš uvažliva, to stvarajecca ŭražańnie, što my pastajanna pieražyvajem Hod surka. Štohod biełaruskamu ŭradu terminova patrebnyja hrošy, štohod Rasija padstaŭlaje svajo plačo, — i tak kožny hod.
Praktyčna štohod Biełaruś atrymlivaje padtrymku nie tolki ad Rasii, ale i ad Jeŭrazijskaha fondu stabilizacyi i raźvićcia, i heta, pa sutnaści, taksama kvazirasijskija hrošy.
U 2015-m uziali ŭ doŭh u Rasii $1 młrd 572 młn, u 2017-m zapazyčańni ŭ Rasii i JEFSR sumiesna skłali ŭžo $2 młrd 110 młn, u 2018 heta byŭ «usiaho tolki» $1 młrd 79 młn.
Adzinym anamalnym hodam staŭ 2019-y, kali sumarna viarnuli daŭhoŭ Rasii i JEFSR bolš ($979 młn), čym uziali ($730 młn) u ich kredytaŭ. Zrešty finansavym apietytam taho hoda dapamoh Kitaj: u 2019 Biełaruś atrymała ad Padniabiesnaj kredytaŭ na $638 młn, ale ŭsio chutka viarnułasia nazad, i ŭ 2020 i 2021 my znoŭ stabilna bolš biarom u Rasii i JEFSR pazyku, čym addajom.
Dla paraŭnańnia, kali ŭ 2015-ym sukupnyja płaciažy pa kredytach, jakija pryjšli z boku Rasii i JEFSR, składali $653 młn, to ŭ 2020 heta było ŭžo $1 młrd 86 młn.
U 2021-m z ulikam abiacanych $640 młn my ŭ ahulnym atrymajem ad Rasii kala $1,404 młrd. Mahčyma, heta nie kančatkovaja ličba zapazyčańniaŭ. Pry hetym my ŭžo vypłacili za minułuju častku 2021-ha $689 młn doŭhu tolki Rasii i Jeŭrazijskamu fondu stabilizacyi i raźvićcia. Heta značyć, pa sutnaści, pałova hrošaj, jakija my ŭ hetym hodzie pazyčyli ŭ Rasii, pajšła ŭ zalik starych daŭhoŭ.
Padvodziačy vynik, my bačym nastupnyja tendencyi.
Pieršaje — kredytnyja apietyty Biełarusi stabilna vysokija, a voś mahčymaściaŭ atrymać pazyki stanovicca ŭsio mienš.
Druhoje — Rasija zastajecca asnoŭnym kredytoram i Biełaruś traplaje va ŭsio bolšuju ad jaje zaležnaść. Pry hetym vydzialaje hrošy Maskva ŭsio bolš aściarožna.
Treciaje — my rehularna biarom u doŭh bolš, čym addajom. Z ulikam taho, što napieradzie majačać usio bolš žorstkija mižnarodnyja sankcyi, takaja situacyja abiacaje surjoznyja prablemy.
Kab zrazumieć, čym heta moža pahražać, dastatkova z hoda ŭ hod nabirać daŭhi, płacić pa ich mienš, čym brać pazyku, a potym pazbavicca krynic ich refinansavać.
