Ekśpierty praviali apytańnie biełaruskich startapaŭ: pytalisia pra ich dziejnaść, vynikovaść i pierśpiektyvy va ŭmovach palityčnaha i ekanamičnaha kryzisu ŭ Biełarusi, vyklikanaha vybarami minułaha hoda i padziejami, źviazanymi ź imi.
Dla abjekta daśledavańnia była ŭziataja baza danych startap-chaba Imaguru i aksieleratara TechMinsk. Apytvali startapy, u jakich chacia b adzin z zasnavalnikaŭ z daminujučaj dolaj — biełarus. Na 41 pytańnie ankiety adkazali pradstaŭniki 220 startapaŭ.
Asnoŭnyja vysnovy daśledavańnia nastupnyja:
— Palityčny kryzis u Biełarusi niehatyŭna paŭpłyvaŭ na pracu ŭsiaho biełaruskaha biznesu i pieravažnaj bolšaści startapaŭ u pryvatnaści. Minsk pierastaŭ być centram ekasistemy. Kamandy pracujuć dystancyjna.
— Siarod najbolš častych nastupstvaŭ palityčnaha kryzisu startapy adznačajuć rełakacyju biznesu (52%), źmianieńnie płanaŭ i dadatkovyja vydatki (45%), paharšeńnie dostupu da źniešniaha finansavańnia (32%), pahrozy raźvićciu biznesu (28,5%), źnižeńnie efiektyŭnaści pracy kamandy (27%).
— 58% biełaruskich startapaŭ źjechali ź Biełarusi i tolki 4% adznačyli, što nie bačać pryčyn dla pierajezdu, bo ich usio zadavalniaje.
— Čverć zasnavalnikaŭ nie płanujuć viartacca ŭ Biełaruś. Dla astatnich asnoŭnaj umovaj viartańnia źjaŭlajucca demakratyčnyja pieramieny.
— 70% startapaŭ ličać, što nastupstvy kryzisu praciahnucca i paśla 2023 hoda.
— Bolšaść biełaruskich startapaŭ majuć kampanii za miažoj. Kožny treci startap padniaŭ inviestycyi ŭ kryzisny pieryjad.
Tolki 3% startapaŭ płanujuć pryciahvać hrošy ŭ nastupnym hodzie ŭ biełaruskich inviestaraŭ.
Kamientujučy pracesy, zasnavalnik hrupy kampanij Belbiz i startap-chaba Imaguru Taćciana Marynič nazyvaje rełakacyju pradstaŭnikoŭ techničnych startapaŭ hałoŭnym trendam apošniaha hoda ŭ industryi.
«Heta drenna dla ekanomiki tut i ciapier. Dla samich startapaŭ heta vialikija źmieny, źmiena raniejšych zvyčak pobytu i pracy, a značyć, i efiektyŭnaj pracy kamandy. Ź inšaha boku, heta kałasalnaja škoła biznesu i žyćcia, jakuju prachodziać siońnia našy maładyja ludzi. Ja ŭpeŭnienaja, što vielmi mnohija stanuć raści navat chutčej i jakaśniej, čym kali b jany zastalisia ŭ Biełarusi. Mnohija ź ich viernucca, kali ŭ Biełarusi adbuducca demakratyčnyja źmieny. Viernucca z nabytym vopytam, inviestycyjami, mižnarodnymi biznes-partniorami. Heta budzie kałasalny ŭkład u novuju biełaruskuju ekanomiku. Tak, isnujuć surjoznyja ryzyki, što viernucca nie ŭsie. Kab minimizavać hetuju ryzyku, važna vybudoŭvać alternatyŭnuju infrastrukturu padtrymki biełaruskich startapaŭ za miažoj, praciahvajučy budavać supolnaść anłajn i raźvivajučy takija chaby, jak Imaguru, u tych krainach, dzie bolš za ŭsio biełaruskich IT-śpiecyjalistaŭ.
PandaDoc acenieny minimum u $1 młrd — ciapier heta kampanija-adnaroh