Byłoha śledčaha asudzili na dva hady kałonii za ŭdzieł u žnivieńskich akcyjach
5 kastryčnika ŭ sudzie Frunzienskaha rajona h. Minska vynieśli prysud 43-hadovamu Alaksieju Siańkovu. Jaho pryznali vinavatym pavodle art. 342 Kryminalnaha kodeksa i prysudzili da dvuch hadoŭ pazbaŭleńnia voli ŭ kałonii ahulnaha režymu. Mužčyna — padpałkoŭnik justycyi ŭ adstaŭcy. 5 lipienia 2021 hoda jaho zatrymali na rabocie ŭ Śledčym kamitecie, dzie jon na roznych pasadach pracavaŭ ź lipienia 2012 hoda. U hety ž dzień jaho zvolnili pa pahadnieńni bakoŭ. Alaksiej Uładzimiravič maje ordeny i miedali, a taksama hramaty za biezdakornuju słužbu, paviedamlajuć pravaabaroncy.
Jahony małodšy brat — palitźniavoleny były čynoŭnik Juryj Siańkoŭ.
Juryj Siańkoŭ — były načalnik finansavaha adździeła administracyi Leninskaha rajona Minska. Jaho zatrymali 30 krasavika 2021 hoda i piać razoŭ asudzili pa administracyjnych spravach, u vyniku čaho jon atrymaŭ 50 sutak aryštu. Zatym jaho pieraviali ŭ SIZA ŭžo pa kryminalnaj spravie. Jaho abvinavacili pa dvuch artykułach Kryminalnaha kodeksa: pa art. 342 KK — za ŭdzieł u akcyjach pratestu 16 i 23 žniŭnia 2020 hoda, a taksama pa art. 368 KK — za repost u telehramie. Mužčyna atrymaŭ try hady pazbaŭleńnia voli ŭ kałonii ahulnaha režymu.
Spravu Alaksieja Siańkova razhledzieła sudździa Natalla Buhuk. Bok dziaržabvinavačańnia padtrymaŭ pamočnik prakurora Frunzienskaha rajona Dźmitryj Chavaŭka.
Pazoŭ «Minsktransa» na 11 tysiač 819 rubloŭ 76 kapiejek budzie razhledžany ŭ hramadzianskim paradku.
Alaksieja Siańkova abvinavacili ŭ tym, što 16 i 23 žniŭnia 2020 hoda jon pryniaŭ udzieł u maršach — hrupavych dziejańniach, jakija hruba parušyli hramadski paradak i paciahnuli za saboj parušeńnie raboty transpartu. Taksama jon plaskaŭ u dałoni, vykrykvaŭ łozunhi.
Dziejańni adbyvalisia na praśpiektach Mašerava i Pieramožcaŭ, płoščy Niezaležnaści.
Mužčyna patłumačyŭ, što 16 žniŭnia sustreŭsia z bratam Juryjem u handlovym centry «Karona», jany vyrašyli pahladzieć, kolki ludziej vyjšła. Nie dachodziačy da Steły, jany sfatahrafavalisia razam, u rukach jany nie mieli simvoliki, na fonie byli ściahi BČB. Paśla 19-j hadziny jany razyšlisia. Alaksiej pryznaŭ, što mieła miesca być abmiežavańnie ruchu transpartu, ale jon nie bačyŭ, kab jano było pobač ź imi.
Taksama jon pryznaŭ, što plaskaŭ u dałoni i kryčaŭ «Žyvie Biełaruś!»
Kamientary