U 2021 hodzie nizki ŭradžaj abvaliŭ vypusk u sielskaj haspadarcy. Daŭhi fłahmanaŭ ahrarnaha siektara pabili histaryčny maksimum. Pa vynikach 9 miesiacaŭ 2021-ha dabaŭlenaja vartaść u sielskaj, lasnoj i rybnaj haspadarcy ŭpała na 6%, pišuć banki24.by.
Heta druhi horšy vynik siarod pazicyj, jakija apieratyŭna publikujuć statystyčnyja orhany (paśla budaŭničaha siektara). Źnižeńnie dabaŭlenaj vartaści pryviało da tarmažeńnia rostu VUP Biełarusi na 0,5 pracentnych punkta, heta značyć, što ŭ adsutnaść ahrarnaha spadu ekanamičny rost za 9 miesiacaŭ skłaŭ by nie 2,7%, a kala 3,2%.
Vytvorčaść sielhaspradukcyi za 9 miesiacaŭ skaraciłasia da 2020 hoda na 6,6%. Pry hetym spad asobna za vierasień skłaŭ 13,7%. Pamianšeńnie vypusku ŭ sielskaj haspadarcy źviazana z padzieńniem vałavoha zboru raślinnych kultur.
Na 1 kastryčnika zbor zbožžavych i zierniebabovych biez kukuruzy ŭ tonach źniziŭsia da takoj ža daty ŭ 2020-m na 19,7%, bulby — na 28,4%, harodniny adkrytaha hruntu — na 18,2%, cukrovych burakoŭ — na 18%.
Za 8 miesiacaŭ 2021-ha siaredni zarobak u raślinavodstvie vyras da 2020-ha ŭsiaho na 2,8%, u žyviołahadoŭli — na 3,7%.
Paraŭnajcie: rost realnaj zarpłaty ŭ cełym pa ekanomicy skłaŭ 5,2%. Viadoma, što ahraryi zajmajuć adno z apošnich miescaŭ u krainie pa pamiery hadzinnaha zarobku i adnačasova pracujuć bolš za astatnich.
To-bok pry nizkim roście siaredniaj zarpłaty ŭ haliny adryŭ ad inšych vidaŭ dziejnaści ŭ ekanomicy nie skaračajecca. Za 8 miesiacaŭ pa ahrasiektary było zvolniena 63 tys. rabotnikaŭ, a pryniata na pracu — 59 tys. Takim čynam, čysty adtok kadraŭ z fłahmanaŭ haliny skłaŭ kala 4 tys. čałaviek.
Siaredniaja rentabielnaść prodažaŭ pa fłahmanach sielskaj haspadarki skłała za 8 miesiacaŭ kala 6,5%. Adnak miedyjannaja rentabielnaść u haliny istotna nižejšaja. Heta vynikaje z raźmierkavańnia fłahmanaŭ pa ŭzroŭni rentabielnaści: 26,4% kampanij nieśli straty z prodažaŭ (nierentabielnyja), a 34,5% mieli rentabielnaść u miežach 0-5%.
Siarod fłahmanaŭ haliny nizkaja ŭdzielnaja vaha vysokadachodnych biznesaŭ. Usiaho 3,9% kampanij u 2021 hodzie pakazali rentabielnaść prodažaŭ nie mienš za 20% i tolki 0,6% — nie nižej za 30%.
Na 1 vieraśnia sumarnyja daŭhi fłahmanaŭ sielskaj haspadarki skłali 16,3 młrd BYN, i heta maksimalnaja suma za ŭsiu historyju zamieraŭ pa biahučaj mietodycy. Papiaredni rekord pratrymaŭsia ŭsiaho 2 miesiacy. Z pačatku 2021 hoda pamier sukupnaj zapazyčanaści ŭ sielskaj haspadarcy vyras na 9,3%.
Kamientary