Doma ŭ mužčyny pravodzili pieratrus kala dźviuch hadzin. Zvolnili jaho ŭ toj ža dzień.
Pieršy sud na Dzianisam prajšoŭ 24 vieraśnia ŭ sudzie Centralnaha rajona. Jaho abvinavacili ŭ «niepadparadkavańni supracoŭniku milicyi na terytoryi Centralnaha RUUSa», za što skłali pratakoł pa art. 24.3 KaAP.
Zhodna z pakazańniami śviedki, zatrymali mužčynu «pa padazreńni va ŭdziele ŭ masavych mierapryjemstvach», ale Dzianis nibyta admoviŭsia vyjści z mašyny, upiraŭsia, čaplaŭsia za adzieńnie. Harajmovič nie pryznaŭ vinu i śćviardžaŭ, što ŭ RUUS zachodziŭ z supracoŭnikam KHB, jaki pravodziŭ dopyt.
Sudździa Dźmitryj Karsiuk adchiliŭ chadajnictva Dzianisa ab vykliku śviedak i prahladzie videa z kamier nazirańnia ŭ RUUSie. Vynikam tady staŭ 15-sutačny aryšt, paśla jakoha mužčyna na volu tak i nie vyjšaŭ — na jaho znoŭ skłali pratakoł pa art. 24.3 KaAP. Sudździa Karsiuk znoŭ pryznaŭ Harajmoviča vinavatym i aryštavaŭ na čarhovyja 15 sutak.
25 kastryčnika ŭ Centralnym sudzie prajšoŭ treci sud nad inžynieram. Na hety raz spravu razhladała sudździa Viktoryja Šabunia. Pa słovach milicyjanta na sudzie, Dzianisa ź CIPa na Akreścina pavieźli znoŭ u RUUS, bo jaho «padazravali ŭ zachoŭvańni ekstremisckich materyjałaŭ». Na terytoryi ŭpraŭleńnia jon užo treci raz akazaŭ niepadparadkavańnie milicyjantam, admoviŭšysia prajści ŭ budynak.
Sam Dzianis kaža, što kali jaho vyvieli z kamiery na Akreścina, jaho sustreli nieviadomyja mužčyna i žančyna, kab advieźci ŭ RUUS.
Jamu nadzieli kajdanki i pasadzili ŭ pryvatny aŭtamabil. Pa prybyćci ŭ RUUS jamu navat dazvolili papalić i źniali kajdanki. Tamu Dzianis admaŭlaje svaju vinu, bo jon dobraachvotna prajšoŭ za milicyjantami. U vyniku sudzia Šabunia znoŭ pakarała Harajmoviča 15-sutačnym aryštam.
Ahułam Dzianis praviadzie za kratami 45 sutak.