Na tradycyjnaj letniaj naradzie z kiraŭnikami dypmisij biełaruski aficyjny kiraŭnik pastaviŭ umovu: kali ZŠA chočuć adnavić farmat ambasady, chaj zdymajuć ekanamičnyja sankcyi.
Z adnaho boku, jon trochi zavyšaje patrabavańni. Bo, stroha kažučy, dypłamatyčnuju vajnu letaś u sakaviku spravakavała nie samo ŭviadzieńnie sankcyj suprać «Biełnaftachima» (heta adbyłosia jašče ŭ 2007 hodzie), a ich kankretyzacyja (de-fakta — uzmacnieńnie). Zdavałasia b łahičnym pastavić umovaj viartańnie da status-kvo (asłableńnie sankcyj). Ale Łukašenka, vidać, pačuvajecca na kani (ci na «charlei»?). Čamu b i nie ryzyknuć, kali karta idzie, dy i ryzyki nasamreč nijakaj?
Ź inšaha boku, patrabavańni da Vašynhtona stali bolej realistyčnymi. Kali ŭ červieni prylatali kanhresmieny, Łukašenka zajaviŭ, što varta ŭvohule skasavać «Akt ab demakratyi ŭ Biełarusi». Zaraz pra toj zakon nie zhadana. Chalera ź im! Usio adno vykonvać jahonyja punkty biełaruskaje načalstva nie razhonicca.
Łukašenka dazvoliŭ sabie ŭskosnuju palemiku z zachodnimi mientarami. Maŭlaŭ, «važnaja dy patrebnaja nie vonkavaja “demakratyčnaja” abałonka. I tym bolej nie pryviezienaja i nie nakinutaja zvonku. Takaja śpiecham pryvitaja demakratyja niaŭstojlivaja…». Jašče bolej, «takija “mičurynskija” praktykavańni robiać ciažkapapraŭnuju škodu krainie, ekanomicy i, u rešcie rešt, narodu».
Adčuvajecca styl śpičrajteraŭ staroj zahartoŭki. Moładź, badaj, i nie čuła pra toha Mičuryna :) Kranaje niastomny kłopat, kab narod nie zaraziŭsia demakratyčnaj bacyłaj, jak tym śvinym hrypam.
Asobna padkreślena, kab i ŭ ES nie spadziavalisia, što buduć nakidać niejkija patrabavańni. My, maŭlaŭ, uvachodzim va «Uschodniaje partniorstva» nie prośbitami i budziem sami vyznačać farmat.
Možna adznačyć jašče niekalki zajaŭ na naradzie 23 lipienia.
Biełaruś nie źbirajecca rabić vybar pamiž Rasijaj i Jeŭrasajuzam, zaznačyŭ Łukašenka. Maŭlaŭ, ŭzajemadziejańnie z Brusielem nie moža budavacca na škodu družalubnym dačynieńniam z Maskvoj i naadvarot.
Jak ža, z Maskvoj — družalubniej niama kudy: z vojnaŭ na ŭschodnim froncie nie vyłazim! Łukašenka i sam užyŭ cikavy termin pra pahrozu «ciažkavahavaj dziaržaŭnaści» z boku Rasii.
Pa sutnaści ž hetaja nibyta pryhožaja i vysakarodnaja admova ad vybaru — eŭfiemizm, jaki maskuje staŭku na palityku arelaŭ, raźlik na doŭhaterminovy resurs manieŭravańnia miž Uschodam i Zachadam.
Zrešty, nie zabyty i inšyja viektary. U pryvatnaści, zaznačana, što ŭ pierśpiektyvie Ukraina moža stać novym šlacham pastaŭki enierharesursaŭ. Minsk daŭno zanduje hlebu ŭ hetym kirunku, ale na naradzie z sanoŭnymi dypłamatami fraza hučyć užo jak aficyjnaja stratehičnaja ŭstanoŭka.
Sajuzny prajekt Łukašenka nazvaŭ daŭhabudam, ale nie pravałam i nie ŭtopijaj. Formuła, kab zachavać tvar. Nasamreč — mienavita pravał, mienavita ŭtopija.
I chacia na samym pačatku pramovy było padkreślena, što mudry zamiežnapalityčny kurs niepachisny, havorka nibyta tolki pra karektavańnie niuansaŭ, de-fakta adbyłasia chaj sabie zmušanaja, ale istotnaja pierarobka ŭsioj kancepcyi. Raniej vyhladała tak, što alternatyvy, procivahi Rasii niama. Ciapierašniaja dekłaracyja raŭnaznačnaści dačynieńniaŭ z Uschodam i Zachadam — heta amal što revalucyjnaja źmiena aryjenciraŭ.
Miž tym rasijski cisk nikudy nie padzieŭsia, jon uzmacniajecca. Namieśnik ministra zamiežnych spraŭ Rasii Karasin nazvaŭ dziŭnaj pazicyju Minska ŭ dačynieńni da Abchazii i Paŭdniovaj Asiecii. I vielmi padobna na toje, što mienavita zvanok z Kramla ŭ duchu «nie čapajcie našu trubu» zmusiŭ chucieńka znoŭ dać zialonaje śviatło prapampoŭcy rasijskaj salarki pa biełaruskim učastku maršrutu Unieča — Vientśpiłs.
Analityk Leanid Zaika znajšoŭ novy termin dla charaktarystyki siońniašnich stasunkaŭ pa linii Minsk — Maskva: hieaekanamičnaja vajna.
Jana budzie tleć, i jaje łohika stanie i nadalej vyznačać pavolny drejf Biełarusi padalej ad Rasii. Chacia sam Łukašenka, kolki b ni siadłaŭ «charlej», prazachodnim, kaniečnie ž, nikoli nie stanie, tut jon ščyry.
Ale ź jaho tezaj, što zamiežnaja palityka Minska nabyła novuju jakaść, možna pahadzicca. Pry hetym, zaŭvažcie, Łukašenka pryznaŭ, što raniej jana była «adnamiernaj». Krasamoŭnaja i ahavorka pra «hady izalacyi» (što raniej uparta admaŭlałasia).
«Raniej Zachad byŭ voraham, a rasijcy — bratami, adzinymi stratehičnymi partniorami. Zaraz faktyčna kanstatujecca parytet u stasunkach z Maskvoj i Zachadam. I heta — značny zruch, navat pavarot u zamiežnaj palitycy», — miarkuje palitołah Valer Karbalevič.
Ź jaho słoŭ, na naradzie 23 lipienia adbyłosia zaćviardžeńnie toha bolej zbałansavanaha zamiežnapalityčnaha kursu, jaki Minsk pačaŭ pravodzić paśla letašniaj kaŭkazskaj vajny.
«U astatnim ža — ničoha novaha», — reziumuje Karbalevič.
Sapraŭdy, pramova na naradzie lišni raz zaśviedčyła: cyvilizavanyja demakratyčnyja standarty (a heta mienavita standarty, i zajavy pra škodnaść inšaziemnych uzoraŭ nie vytrymlivajuć nijakaj krytyki) buduć i nadalej ujaŭlacca ciapierašniaj kiroŭnaj viarchoŭcy śmiarotna niebiaśpiečnaj pandemijaj.
Inšaja reč, što Złučanym Štatam nie da Biełarusi, a ES staŭ na rejki «reałpalityk». Tak što Łukašenka strymana pachvaliŭ zachodnikaŭ za toje, što ŭ miežach novaha kursu jany kinuli durnoje :) i užo nie staviać na mecie «adchileńnie dziejnaj ułady».
ZY. Uviečary BT pakazała toje, što amal abminuli ŭvahaj ahienctvy. U Małoj zale Pałaca respubliki faktyčna była zładžana vialikaja vytvorčaja narada z udziełam Sidorskaha, Prakapoviča, ministraŭ, hiendyrektara MTZ dy inšych haspadarnikaŭ. U hołasie Łukašenki hučali mietaličnyja notki. Zvyšzadača: piščom leźci na ŭsie rynki, razhružać zatavaranyja składy!
Ale pieratvareńnie dypłamataŭ u dyleraŭ nie vyrašyć prablemy. U biełaruskaha tavaru niama pierśpiektyvy biez karennaj madernizacyi ekanomiki. I heta taksama šturchaje da lepšych dačynieńniaŭ z Zachadam.
