Z červienia 2021 hoda brytanskaja kampanija Rolls Royce Group spyniła supracoŭnictva ź BiełAZ, kudy pastaŭlała ruchaviki. Pastaŭki ŭ Biełaruś išli praź niamieckuju daččynuju kampaniju MTU Friedrichshafen GmbH. Da takoha rašeńnia ŭ brytanskaj kampanii pryjšli paśla ŭviadzieńnia Jeŭrasajuzam čarhovaha pakieta sankcyj — Rolls Royce pryniała miery ŭ adpaviednaści sa svaim kodeksam pavodzinaŭ, karparatyŭnymi kaštoŭnaściami i jurydyčnymi abaviazacielstvami.
Akramia Rolls Royce Group, u vyniku ŭviadzieńnia sankcyj JeC, ź BiełAZ spyniła pracavać amierykanskaja kampanija Cummins, jakaja taksama pastaŭlała ruchaviki.
Niamieckaja kampanija Becker Group, jakaja pastaŭlała praz dystrybutara pramysłovyja farby i inšuju pradukcyju, spyniła ŭsie apieracyi ź BiełAZ ź lipienia hetaha hoda praz novyja sankcyi JEZ suprać biełaruskaha pradpryjemstva. Anałahičnaja situacyja adbyłasia z dackaj hrupaj Danfoss i niamieckaj kampanijaj Liebherr.
U sakaviku niamiecki pastaŭščyk matoraŭ Deutz zajaŭlaŭ, što nie maje biahučych kantraktaŭ ź BiełAZ i zapatrabavaŭ u biełaruskaha partniora infarmacyju ab masavych parušeńniach pravoŭ rabočych na pradpryjemstvie, što moža paŭpłyvać na patencyjnyja budučyja kantrakty.
Straciŭ bujnych partnioraŭ i BMZ — šviedskaja Scandia Steel admoviłasia ad pastavak biełaruskaha pradpryjemstva z-za parušeńniaŭ na im pravoŭ rabočych. Represii ŭ partniorskaj kampanii iduć nasupierak z etyčnymi Praviłami Scandia Steel, tamu Saviet dyrektaraŭ prypyniŭ budučyja zakazy ź leta 2021. Ab spynieńni adnosin z BMZ taksama letam zajaviła japonskaja hrupa Yokohama.
U červieni taksama stała viadoma, što partnior BMZ, kampanija Michelin płanuje pravieści źniešni niezaležny aŭdyt datyčna situacyi z pravami rabočych na pradpryjemstvie. Taki aŭdyt pavinien pryvieści da rašeńnia, ci nie para pierapynić supracoŭnictva z režymnym zavodam.
U krasaviku źjaviłasia infarmacyja, što AAT «Hrodna Azot» pazbaviŭsia partniora ŭ asobie niamieckaj kampanii Helm AG, jakaja kuplała 10% hadavoha abjomu pradukcyi biełaruskaha pradpryjemstva. Mahčymaje dalejšaje supracoŭnictva-tolki paśla pravierki ŭmoŭ achovy pracy na «Azocie».
Ceły šerah partnioraŭ straciŭ AAT «Naftan» z-za taho, što pradpryjemstva trapiła pad sankcyi. Važnyja dla «Naftana» abjekty, na jakich viaducca składanyja i kvalifikavanyja pracy, pakinuli firmy: Albemarle (ZŠA), Axens SA (Francyja), Hansen & Rosenthal (Hiermanija), Haldor Topsoe (Danija), SEW Eurodrive (Hiermanija), Bopp&Reuther IMI (Hiermanija), IMI Critical (ZŠA), Sundyne (ZŠA), Sundyne International SA (Francyja), Bombas Ercole Marelli (Ispanija), Honeywell (ZŠA), Fives Itas (Italija), Severn unival (Vialikabrytanija). Spynili supracoŭnictva i UOP UK (Vialikabrytanija), Koch Glitch (Italija), Flowserve (ZŠA), Emerson (ZŠA), Baker Hughes (ZŠA).
Uletku JeC, ZŠA i Vialikabrytanija ŭviali sankcyi i suprać tytuniovaj haliny Biełarusi. Nastupstvy hetaha adčuła hrodzienskaja tytuniovaja fabryka «Nioman»: ź joj spyniła supracoŭnictva z British American Tobacco. A niamieckaja kampanija Hauni Maschinenbau Gmbh admoviła ŭ pastaŭcy zapčastak, absłuhoŭvańni i padtrymcy svajho abstalavańnia. U Vyniku biełaruskaje pradpryjemstva vyrašyła zakuplać kitajskaje abstalavańnie naŭzamien isnujučaha niamieckaha.
U śniežni 2020 biełaruskaja kampanija Synesis trapiła ŭ sankcyjnyja śpisy JeC, bo ŭ Jeŭropie pastanavili, što raspracoŭka Synesis, płatforma videanazirańnia Kipod, mahła dapamahać režymu vyličać udzielnikaŭ pratestaŭ. U vyniku ad kampanii syšoŭ amierykanski partnior GSD Venture Studios, bo jon źjaŭlajecca «rašučym prychilnikam hramadzianskich i palityčnych pravoŭ».
U žniŭni hetaha hoda stała viadoma, što Philip Morris pierastała pradavać IQOS u Biełarusi. Kampanija «Enierha-OIŁ «źjaŭlajecca manapalistam na impart u Biełaruś nahravanaha tytuniu «HEETS» i sistem nahravańnia tytuniu IQOS, a jaje ŭładalnik Alaksiej Aleksin trapiŭ pad sankcyi JeC.
Aproč inšaha, praz sankcyi francuzskaja kampanija TotalEnergies SE źviarnułasia da ahienctva S & P Global Platts z prośbaj ustrymacca ad zakupak nafty ŭ kampanij, jakija naležać rasiejskamu biznesoŭcu Michaiłu Huceryjevu.
Nahoda pierahledzieć svaju pracu ź biełaruskimi partniorami jość i mižnarodnych bankaŭ. Aŭstryjski Raiffeisenbank vyrašyŭ nie vykonvać funkcyju pasiarednika dla mižnarodnych pieravodaŭ na rachunki Biełarusbanka, jaki patrapiŭ pad sankcyi ES. Raniej RBI zabiaśpiečvali pracu bufiernych rachunkaŭ dla zamiežnych płaciažoŭ, ale ciapier heta buduć rabić inšyja banki.
Jeŭrapiejski bank rekanstrukcyi i raźvićcia ź vieraśnia 2020 spyniŭ finansavańnie prajektaŭ u Biełarusi, akramia supracoŭnictva z pryvatnymi strukturami. JEBRR taksama ŭzmacniŭ kantrol za finansavańniem pryvatnych kampanij u Biełarusi, kab srodki banka nie patrapili strukturam, źviazanym z režymam.
Mižnarodnaja izalacyja Biełarusi zakranuła i akademičnuju śfieru. Bremienski univiersitet spyniŭ supracoŭnictva z BNTU i zajaviŭ ab hatoŭnaści skasavać kantrakty z BDU. Alternatyvaj ŭ Bremienie bačać padtrymku NKA biełaruskich navukoŭcaŭ i studentaŭ. Ijenski ŭniviersitet zamaroziŭ partniorskija dahavory z BDU. U listapadzie taksama stała viadoma, što ŭniviersitet Ciubinhiena razhladaje mahčymaść nie padavać zajaŭku na finansavańnie partniorstva z 5 biełaruskimi VNU ŭ ramkach prahramy abmienu Erasmus.
