Ukrainskija vajskoŭcy. Fota Minabarony Ukrainy.
Pasolstva ZŠA ŭ Kijevie zapytała ŭ Dziaržaŭnaha departamienta dazvoł na vyjezd usiaho nieabaviazkovaha piersanału i ich rodnych, paviedamlaje amierykanski telekanał Si-En-En sa spasyłkaj na šmatlikija krynicy.
Pres-sakratar zamiežnapalityčnaha viedamstva ZŠA na zapyt vydańnia adkazaŭ, što jamu «pakul niama pra što abvieścić». «My, jak i zaŭsiody, pravodzim starannaje płanavańnie na vypadak niepradbačanych abstavin, jak my zaŭsiody robim u razie paharšeńnia situacyi», — paviedamili ŭ pres-słužbie.
Krynica, blizkaja da ŭrada Ukrainy, paviedamiła telekanału, što ZŠA painfarmavała Ukrainu «ab mahčymaj evakuacyi ad pačatku nastupnaha tydnia» siamiej dypłamataŭ, jakija pracujuć u Kijevie.
Krynica skazała, što prezident Ukrainy Uładzimir Zialenski padymaŭ hetuju temu ŭ razmovie ź dziaržsakratarom ZŠA Entani Blinkienam padčas vizitu apošniaha ŭ Kijeŭ 19 studzienia. Zialenski zajaviŭ, što taki krok byŭ by «overreaction», praźmiernaj reakcyjaj.
Čytajcie taksama: Dziarždep: Dla Alaksandra Łukašenki i ludziej, jakija trymajuć jaho va ŭładzie, nadyšoŭ «momant, kali treba vyrašać»
Pra pahrozu novaha ŭvarvańnia Rasiei va Ukrainu zachodnija raźviedki zahavaryli ŭ listapadzie, paśla taho jak Maskva sabrała na miežach z Ukrainaj vialikija siły. Na siońnia jana praciahvaje pierakidać dadatkovyja čaści z Dalokaha Uschodu.
Dadatkovuju tryvohu va Ukrainie i śviecie vyklikała infarmacyja ab praviadzieńni biełaruska-rasijskich vučeńniaŭ uzdoŭž paŭnočnaj miažy Ukrainy. Minabarony Biełarusi nazvała metaj vučeńniaŭ acenku hatovaści sił Sajuznaj dziaržavy da abarony miežaŭ.
U pryvatnaści, u Biełarusi, siarod inšaha, razhornutyja 12 rasiejskich źniščalnikaŭ Su-35 i procirakietnyja sistemy S-400.
Zajaŭlena, što pieršaja častka vučeńniaŭ projdzie da 9 lutaha, druhaja — 10—20 lutaha.
Žychary Bresckaj i Homielskaj abłaściej Biełarusi paviedamlajuć ab prysutnaści rasijskich vajskoŭcaŭ i techniki kala roznych nasielenych punktach. Akramia taho, paviedamlajecca ab pieramiaščeńni rasijskaj vajennaj techniki pa čyhuncy Maskva-Minsk-Brest. Dziasiatki fatahrafij i pastoŭ pra heta źjavilisia ŭ sacyjalnych sietkach i telehram-kanałach. U telehram-kanale čyhunačnikaŭ prajšła infarmacyja, što z Rasii ŭ Biełaruś prybudzie 200 vajskovych ešałonaŭ z žyvoj siłaj i technikaj, čaho nikoli nie byvała raniej.
