Amal $2 miljony za čatyry pakoi. Jak vyhladajuć samyja darahija kvatery ŭ Biełarusi
Pahladzieli, što za kvatery kaštujuć siońnia najbolš na rynku druhasnaha žylla.
«Raskošnaja 4-pakajovaja kvatera z uzrušajučym vidam na nabiarežnuju Śvisłačy i centr horada!» — abiacajuć pradaŭcy samaha darahoha abjekta. Za hetuju kvateru chočuć 1 miljon 950 tysiač dalaraŭ.
«Dom kłasa elit» raźmieščany ŭ histaryčnym centry stalicy, vulica Staražoŭskaja 6, dom «La Trajeckaha». 15-y pavierch, dom pabudavany ŭ 2011 hodzie. Stol — 3 mietry. Až čatyry sanvuzła. «Razynačkaj adnaho z sanvuzłoŭ źjaŭlajecca raskošny chamam z zornym niebam» — ni bolš, ni mienš.
«Sistema «Razumny dom», lifty «OTIS», trochuzroŭnievy padziemny parkinh, u padjeździe — kanśjerž, sistema kruhłasutačnaha videanazirańnia, ujezd na terytoryju začynieny šłahbaumam, dobraŭparadkavany dvor: dziciačaja i spartyŭnyja placoŭki. Nadzvyčajny vid z panaramnych voknaŭ kvatery na abodva baki doma, — havorycca ŭ prapanovie. —
Vytančany dyzajnierski ramont, tolki naturalnyja materyjały».
Na druhim miescy kvatera za 1 miljon 834 tysiačy dalaraŭ. Dva ŭzroŭni, centr Minska — vulica Miaśnikova. Majecca vialikaja terasa na dachu.
«Prajekt spałučaje ŭ sabie pradumanaść kožnaj detali, tut harmanična spałučajucca pryrodnyja materyjały — dreva i kamień, sučasny dyzajn i unikalnyja techničnyja rašeńni, zručnaść i funkcyjanalnaść», — paviedamlaje pradaviec.
Na pieršym uzroŭni — kuchnia, haścioŭnia-stałovaja z vychadam na vialikuju terasu, 2 vialikija spalni z vannaj pakojem i harderobnaj, haściavy sanvuzieł, dapamožnaje pamiaškańnie.
Na druhim uzroŭni: pakoj z vannaj i harderobnaj, vialikaja terasa na dachu ź vidam na horad, havorycca ŭ paviedamleńni.
Da abjavy dałučana šmat renderaŭ i fota pustych pamiaškańniaŭ na etapie zdačy žylla ŭ ekspłuatacyju. Vyhladaje, što pradajecca pamiaškańnie ŭsio ž biez mebli.
Treciaje miesca ŭ našym karotkim rejtynhu — ŭ «vidavoha pientchausa», jaki znachodzicca ŭ staličnym rajonie «Lebiadziny».
230 mietraŭ, 26-y pavierch, košt — 1 miljon 800 tysiač dalaraŭ.
«Vaša kvatera pačynajecca z uvachodu ŭ dom, dzie jana raźmieščana. Elehantnaje łobi z kanśjeržam i resepšenam, utulnaj zonaj čakańnia i biblijatekaj (shared library) padorać Vam absalutna novaje adčuvańnie ŭzroŭniu žyćcia i zrobiać uražańnie na vašych haściej, — piša pradaviec. —
Na dachu parkinha raźmieścicca budynak Kłuba žycharoŭ. U im całkam abstalavany hulniavy pakoj dla dziaciej, zała dla zaniatkaŭ johaj i łaŭnž-zona žycharoŭ prajekta. Dyzajn Kłuba žycharoŭ raspracavany adnoj ź lepšych dyzajnierskich studyj Minska».
U samoj kvatery — italjanskaja mebla, usie pamiaškańni abstalavanyja dla žyćcia.
Taksama ŭ košt uvachodziać dva parkovačnych miesca dla budučych žycharoŭ.
Kamientary