Na terytoryi Minskaj vobłaści 17 žniŭnia ŭvodzicca zabarona na prodaž piva ŭ kijoskach i paviljonach, paviedamiŭ BiełaPAN staršynia RHA «Pierśpiektyva» Anatol Šumčanka.
Pavodle jaho słoŭ, adpaviednaje rašeńnie było pryniata Minskim abłvykankamam 19 maja. U suviazi z uviadzieńniem zabarony RHA «Pierśpiektyva» nakiravała na imia prezidenta zvarot z prośbaj admianić rašeńnie Minabłvykankama.
«Na padstavie ŭžo atrymanaha vopytu možna ŭpeŭniena skazać, što poŭnaja zabarona prodažu piva i słabaałkaholnych napojaŭ u łarkach i kijoskach pryviadzie da šerahu niehatyŭnych nastupstvaŭ», — havorycca ŭ paviedamleńni.
U pryvatnaści, jak ličać u RHA «Pierśpiektyva», zabarona stanie pryčynaj krachu «drobnaroźničnaj handlovaj sietki ŭ nievialikich haradach i pasiołkach», a taksama pryviadzie da «pavieličeńnia biespracoŭja siarod samych sacyjalna nieabaronienych słajoŭ nasielnictva: žančyn pieradpiensijnaha ŭzrostu, maci-adzinočak i ŭčarašnich vypusknikoŭ, jakija nie majuć rabočych śpiecyjalnaściej». Siarod pradaŭcoŭ kijoskaŭ «hety kantynhient składaje praktyčna 100%».
«Takich tolki pa Maładziečnie zastaniecca biez pracy, pa samych ścipłych padlikach, kala trochsot čałaviek, a va ŭmovach krainy hetaja ličba moža akazacca prosta vielizarnaj, — havorycca ŭ paviedamleńni. — Tamu dalejšy los hetych ludziej budzie lažać na sumleńni miascovych uładaŭ».
RHA «Pierśpiektyva» prosić prezidenta admianić «dyskryminacyjnaje, antyrynačnaje rašeńnie Minskaha abłasnoha vykanaŭčaha kamiteta ad 19 maja № 479 «Ab paradku realizacyi piva i słabaałkaholnych napojaŭ», jakoje «pieraškadžaje raźvićciu małoha pradprymalnictva i nanosić uron ekanamičnaj biaśpiecy našaj krainy».
