Zamiest tralejbusaŭ pa byłym praspekcie Mašerava puścili kłon «sotki».
Ad siońnia, 22 lipienia, u Miensku skasavany ruch tralejbusaŭ pa praspekcie Mašerava* i vulicy Lenina ad HUMa da vulicy Sapioraŭ (7 prypynkaŭ).
Zamiest troch maršrutaŭ tralejbusaŭ №21, 39, 56, jakija chadzili na hetym učastku, uviedzieny aŭtobusny maršrut №1. Jon całkam paŭtaraje były tralejbusny maršrut №56 ad Viaśnianki da HUMa i jedzie dalej pa praspekcie Skaryny, vulicach Śviardłova i Kirava da čyhunačnaha vakzału.
Adnačasova ź siońniašniaha dnia źmianiłasia trasa aŭtobusnaha maršrutu №69. Ciapier jon budzie rabić usiaho try prypynki pa praspekcie Mašerava, a zatym pavaročvać na vulicu Drazda i praz Kalvaryjskuju, Haradzki Vał, pr-t Skaryny iści da čyhunačnaha vakzału.
Žycharam Masiukoŭščyny i pr-tu Puškina daviadziecca pierahledzieć svaje transpartyja zvyčki. Ciapier u pačatak praspektu Mašerava možna dajechać tolki ź pierasadkaj: na aŭtobus №1, albo na metro.
Źniaćcio tralejbusaŭ tłumačycca kłopatam pra histaryčny centar Miensku.
Miesiac tamu, 21 červienia, byli skasavanyja tralejbusnyja maršruty na praspekcie Skaryny ad płoščy Jakuba Kołasa da Maskoŭskaha aŭtavakzału. Zamiest piaci źmienienych abo skaročanych tralejbusnych maršrutaŭ (№№1, 2, 37, 54, 55) byŭ pradoŭžany aŭtobusny maršrut №100. Pryčynaj skasavańnia była nazvanaja «aptymizacyja transpartnaha absłuhoŭvańnia».
Pačatkam źniknieńnia tralejbusaŭ z centru stalicy było skasavańnie ruchu pa praspekcie Skaryny ad płoščy Niezaležnaści da płoščy Jakuba Kołasa 10 vieraśnia 2002 hodu. Siarod pryčynaŭ nazyvalisia znošanaść tralejbusnych aporaŭ, niepavarotlivaść tralejbusaŭ, nieestetyčny vyhlad kantaktnych sietak i… plany pa chutkim pieraŭtvareńni praspekta Skaryny ŭ piešachodnuju zonu. Usie tralejbusnyja maršruty byli zamienienyja adnym aŭtobusnym - №100.
❏
Amatary hramadzkaha transpartu pravodzili tralejbus №56 ŭ apošni šlach
Udzielniki prajektu Bytrans i amatary hramadzkaha transpartu zładzili ŭčora raźvitalnuju vandroŭku na 56-m tralejbusie. Pa ŭsim maršrucie jany fatahrafavali i zdymali na videa tralejbusy ŭ tych haradzkich krajavidach, dzie ich siońnia ŭžo niama. Adpaviedny raździeł jość na forumie prajektu.
❏
*U artykule vykarystanyja tradycyjnyja najmieńni centralnych vulic dziela ŭniknieńnia błytaniny.
Sučasnyja aficyjnyja nazvy:
pr-t Mašerava = pr-t Pieramožcaŭ;
pr-t Skaryny = pr-t Niezaležnaści;
vuł. Drazda = pr-t Mašerava.
