Što takoje prymusovaje spahnańnie?
Heta pracedura spahnańnia pazykaŭ, kali hramadzianin admaŭlajecca ŭ termin vypłačvać hrošy. Sudovyja vykanaŭcy, jakija isnujuć u kožnym rajonie i padparadkoŭvajucca Ministerstvu justycyi, pačynajuć spravu (vykanaŭčuju vytvorčaść) na padstavie sudovych pastanoŭvaŭ, a taksama zajavaŭ ad tych, chto patrabuje spahnańnia hrošaj.
Pa ahulnym pravile, vykanaŭčyja dakumienty mohuć być pradjaŭlenyja na praciahu troch hod z momantu nabyćcia mocy sudovaj pastanovaj, adnak moža być ustanoŭlenaje i nieadkładnaje vykanańnie.
U kožnym vypadku vyvučajuć, jaki materyjalny stan u daŭžnika. Kali jon nie nadta zdavalniajučy, možna atrymać adterminoŭku ci rasterminoŭku.
Jak daviedacca, ci jość u mianie zapazyčnaść?
Jak tolki sudovy vykanaŭca pačynaje spravu, jon nie paźniej za nastupny dzień pavinien prainfarmavać hramadzianina. Mohuć dasłać zakazny list ci list na elektronnuju poštu, ale apošnim časam časta papiaredžvajuć pa SMS ci ŭ Viber. I heta zakonna.
Kab pravieryć, ci jość za vami pazyki, možna pahladzieć rejestr zapazyčanaściaŭ pa vykanaŭčych dakumientach na sajcie Ministerstva justycyi.
Dla udakładnieńnia infarmacyi možna pazvanić u kantakt-centr sistemy orhanaŭ prymusovaha vykanańnia pa numary +375 (17) 200 67 78 ci +375 (44) 5292000 (u pracoŭnyja dni z 9.00 da 18.00).
Što mohuć zrabić, kali ja nie zapłaču?
Kali vy admaŭlajeciesia płacić navat paśla taho, jak raspačataje prymusovaje spahnańnie, na vas mohuć nakłaści peŭnyja abmiežavańni:
- aryštavać najaŭnyja hrošy i inšuju majomaść, jakaja naležyć vam i znachodzicca ŭ vas abo ŭ trecich asobaŭ;
- aryštavać hrošy i majomaść, jakaja znachodzicca na vašych rachunkach u bankach, u tym liku depazity, i inšych kredytna-finansavych arhanizacyjach (kampanii abaviazanyja vykanać patrabavańni dziaržorhana);
- apisać, a paśla kanfiskavać majomaść, jakuju možna paśla realizavać u košt pazyki (dadatkovaje žyllo, transpartnyja srodki, bytavaja technika, telefony i kampjutary);
- zabaranić vyjezd z krainy;
- zabłakiravać mahčymaść karystacca mabilnaj suviaźziu;
- zabaranić kiravać aŭto.
Hety śpis nie vyčarpalny. U zakonie adznačajecca, što mohuć prymać i inšyja miery ci adnačasova nakłaści niekalki abmiežavańniaŭ.
Fota: Maksim Malinoŭski, Onliner.by
Kali niama hrošaj, hramadzianin moža prapanavać sudovym vykanaŭcam samastojna pradać majomaść, na jakuju nakłali aryšt.
Pradstaŭnik dziaržorhana vyrašaje, rabić heta, ci ŭsio ž taki daviadziecca pradavać majomaść samastojna. U akcie ŭkazvajecca košt majomaści, tamu realizavać jaje treba pa canie, nie mienšaj za hetuju.
Na kaniec 2021 hoda zaviali bolš za 1,7 młn spravaŭ ab spahnańni pazykaŭ, ź ich bolš za 34 tysiačy — niaspłačanyja alimienty.
Najbolš składana spahnać hrošy z čałavieka, jaki źjechaŭ za miažu. Ale z Rasijaj zaklučanaje pahandnieńnie.
Ciapier možna atrymać daviedku ŭ rasijskaj słužbie sudovych prystavaŭ pra toje, što hramadzianin Biełarusi, jaki žyvie Rasii, nie płacić alimienty na dzicia ŭ Biełarusi, na hetaj padstavie možna raźličvać na dadatkovuju sacyjalnuju i adrasnuju dapamohu ad dziaržavy.
Adnak asnoŭnaja prablema — spahnańnie pazykaŭ ź jurasobaŭ, takich spravaŭ bolš za 800 tysiač. Jak kažuć, mała vyjhrać sud, dalej sychodziać hady na toje, kab atrymać hrošy.
Jak mohuć śpisvać hrošy?
Isnuje aŭtamatyzavanaja infarmacyjnaja sistema vykanańnia hrašovych abaviazalnicvaŭ, jakaja dapamahaje apieratyŭna atrymać infarmacyju, jakija hrošy, na jakich rachunkach i ŭ jakich bankaŭ jość u dažŭnika.
Praces aŭtamatyzavany, banki dziejničajuć apieratyŭna pa zapycie dziaržorhana, hrošy śpisvajucca z rachunkaŭ.
Ja pavinien jašče i płacić sudovamu vykanaŭcy?
Tak, isnuje prymusovy zbor — hrošy, jakija ŭtrymlivajucca z daŭžnika paśla taho, jak pačynajecca pracedura prymusovaha spahnańnia.
Pa majomasnych patrabavańniach spahaniajuć 10% ad sumy pazyki (ale prymusovy zbor nie moža być mienšy za 50% bazavaj vieličyni). Pa niemajomasnych patrabavańniach z hramadzianina i indyvidualnaha pradprymalnika spahaniajuć 5 bazavych vieličyń, ź jurasoby — 10 bazavych.
Pry hetym dajecca siem dzion dla dobraachvotnaha vykanańnia. I kali daŭžnik nie pieravysiŭ hety termin, prymusovy zbor płacić nie treba. Kali toj, chto spahaniaje hrošy, i daŭžnik zaklučyli miravoje pahadnieńnie, suma zboru źmianšajecca na 50%.
Fota Maksim Malinoŭski, Onliner.by
Zdarajecca, kali čałaviek pahasiŭ pazyku, a sudovy vykanaŭca ŭsio adno vystaŭlaje pretenzii. Z takimi skarhami źviartalisia, naprykład, biełarusy, jakija za palityčnuju pazicyju atrymlivali štrafy abo sutki (z abaviazkam apłacić utrymańnie ŭ izalatary).
Heta moža być źviazana z vysokaj zahružanaściu sudovych vykanaŭcaŭ — na kožnaha štomiesiać prychodzicca pad 180 vykanaŭčych dakumientaŭ. Varta zachoŭvać kopii kvitancyj ab spłacie, dla pierastrachoŭki źviazvacca z vykanaŭcami i infarmavać ich ab apłacie.
Kali ž vy nie zhodnyja z sudovym vykanaŭcam, paskardzicca na jaho dziejańni možna va ŭpraŭleńnie justycyi abo sud.
Čytajcie jašče:
Sioleta štrafaŭ chočuć spahnać na 50% bolš, čym letaś
Pieramieny ŭ Miniuście: ministram pryznačyli siłavika. Za što źniali Śližeŭskaha i što budzie dalej?
