Ci mahčymaje ŭvarvańnie Rasii va Ukrainu? Jak situacyja budzie raźvivacca? Vialiki analiz
I biez taho napružanaje infarmacyjnaje pole ŭ piatnicu zapoŭniłasia paviedamleńniami amierykanskich čynoŭnikaŭ ab vierahodnym šyrokamaštabnym nastupleńni Rasii ŭ najbližejšyja dni. Nazyvajecca navat data mahčymaj ataki — 16 lutaha. Ambasada ZŠA i šerah inšych krain nastojliva rekamiendujuć svaim hramadzianam pakinuć Ukrainu. Ci značyć heta niepaźbiežnaść nastupleńnia? I jakija realnyja ryzyki? Što rabić i jak interpretavać infarmacyjnuju płyń, jakaja atačaje hramadzian Ukrainy i susiednich krain? «Ukrainskaja praŭda» praanalizavała biahučuju situacyju i pazicyi bakoŭ, kab zrabić vysnovy i aściarožnyja prahnozy.
U hetym artykule my dajom analiz pa nastupnych pytańniach:
- Ahulnaja apieratyŭnaja situacyja vakoł Ukrainy
- Najbolš i najmienš vierahodnyja scenaryi raźvićcia padziej
- Situacyja ŭ Čornym i Azoŭskim marach
- Pytańni abarony Kijeva
- Hatoŭnaść siłaŭ biaśpieki i abarony
- Čym vyklikanyja pazicyi suśvietnych lideraŭ i ich acenki?
- Što ciapier rabić?
Apieratyŭnaja situacyja vakoł Ukrainy
Pavodle stanu na 12 lutaha ahulnaja kolkaść vojskaŭ Rasijskaj Fiederacyi ŭzdoŭž rasijska-ŭkrainskaj miažy, u Biełarusi i na akupavanych terytoryjach uschodu Ukrainy i Kryma składaje 87 bataljonna-taktyčnych hrup — heta kala 147,8 tysiač vajskoŭcaŭ z ulikam avijacyjnych i marskich składnikaŭ.
Vojski zabiaśpiečanyja adpaviednym uzbrajeńniem, vajskovaj i śpiecyjalnaj technikaj (hł.tablicu i kartu), a taksama štatnymi łahistyčnymi i miedycynskimi padraździaleńniami, ale pakul biez prykmietaŭ dadatkovaha ŭzmacnieńnia, nieabchodnaha dla maštabnych nastupalnych dziejańniaŭ.
Ustalavanaja i funkcyjanuje abjadnanaja sistema kiravańnia vojskami jak na terytoryi Biełarusi, tak i Rasijskaj Fiederacyi. Vojski i siły RF aktyŭna ažyćciaŭlajuć mierapryjemstvy apieratyŭnaj i bajavoj padrychtoŭki.
Praciahvajecca praviadzieńnie sumiesnych vučeńniaŭ Uzbrojenych Siłaŭ Rasii i Biełarusi «Sajuznaja rašučaść — 2022», jakija pavinny zaviaršycca 20 lutaha. Ad RF na terytoryi Biełarusi pryciahnuta kala 15 bataljonaŭ — taktyčnych hrup, i inšyja padraździaleńni. Dadatkova razhornutyja padraździaleńni 103-j rakietnaj bryhady, jakija majuć na ŭzbrajeńni ATRK «Iskander» i inšyja vojski Uschodniaj vajskovaj akruhi Rasiei.
Za apošnija tydni bojehatoŭnaść raźmieščanych na miažy z Ukrainaj rasijskich padraździaleńniaŭ značna ŭzmacniłasia. Heta možna rastłumačyć jak praviadzieńniem vučeńniaŭ, infarmacyjna-psichałahičnych apieracyj, tak i hatoŭnaściu da praviadzieńnia patencyjnaj vajennaj apieracyi.
Najbolš i najmienš vierahodnyja scenaryi raźvićcia padziej
Kolkaść siłaŭ i srodkaŭ RF, uklučajučy raźmieščanyja na terytoryi Biełarusi, nie pieravysiła čakanych. My havaryli pra mahčymaść uzmacnieńnia US RF pablizu miežaŭ Ukrainy da 160 tysiač, ale pakul kolkaść nie pieravyšaje 150-ci. Ciapier nazapašanych siłaŭ i srodkaŭ dla šyrokamaštabnaj apieracyi z metaj zachopu ŭsioj abo značnaj častki Ukrainy niedastatkova. Tamu ŭ najbližejšaj pierśpiektyvie prahnozy adnosna vierahodnaści takich scenaryjaŭ nie paćviardžajucca.
Bolš taho, my ličym, što takija scenaryi małavierahodnyja ŭ ahladnaj budučyni praz roznyja faktary.
Kali koratka, to ciapier nie nazirajecca aktyŭnych dziejańniaŭ u Rasii pa padrychtoŭcy sotniaŭ tysiač vojskaŭ, nieabchodnych dla takoha maštabnaha nastupleńnia. U ciapierašni čas taksama nie nazirajecca istotnych mieraŭ pa stvareńni stratehičnych reziervaŭ i mabilizacyi na bazie centraŭ zabieśpiačeńnia mabilizacyjnaha razhortvańnia US RF.
Akramia taho, praviadzieńnie takoj apieracyi budzie mieć nadzvyčaj niehatyŭnyja nastupstvy dla Rasii. Kali ŭ formułu harantavana pravalnaha napadu na Ukrainu ŭklučyć nievajskovyja składniki, mižnarodnuju izalacyju i sankcyi, to vynik takoj apieracyi budzie katastrafičnym dla ŭsioj Rasii, a nie tolki Kramla.
Hetak ža ličym małavierahodnymi bolšaść łakalnych scenaryjaŭ pa zachopie asobnych haradoŭ i terytoryj z-za adsutnaści palityčnaj metazhodnaści. Pry hetym niekatoryja bajavyja dziejańni na asobnych kirunkach mahčymyja tolki dla adciahvańnia ŭvahi siłaŭ abarony Ukrainy.
My praciahvajem ličyć, što scenaryi masiravanaj bambardziroŭki i rakietnych udaraŭ, jakija mohuć pryvieści da maštabnych strataŭ siarod cyvilnaha nasielnictva, źjaŭlajucca nierealistyčnymi. Takija dziejańni mohuć pieraškodzić płanam rasijskaha palityčnaha kiraŭnictva zavajavać «sercy i rozumy» ruskamoŭnaha nasielnictva Ukrainy. Jak vynik, žadańnie hipatetyčnaj padtrymki Pucina va Ukrainie moža źniknuć navat u jaho niešmatlikich prychilnikaŭ.
Adnak asobnyja rakietnyja i avijacyjnyja ŭdary pa vajskovych abo infrastrukturnych abjektach mahčymyja tolki jak srodak padtrymańnia naziemnaj apieracyi abo jak srodak psichałahičnaha cisku.
Razam z tym zastajecca vierahodnaj sproba arhanizacyi Kramlom padziei-tryhiera — spłanavanaj pravakacyi, naprykład, na ŭschodzie Ukrainy. Meta hetych dziejańniaŭ — lehitymizavać uvod rasijskich vojskaŭ na terytoryju Ukrainy abo ŭzbrojenaj eskałacyi na linii sudakranańnia.
Naohuł abvastreńnie na ŭschodzie Ukrainy źjaŭlajecca vysokaimaviernym. Zastajucca vysokaimaviernymi scenaryi roznych varyjantaŭ hibrydnaha našeścia biez vajskovaha składnika ŭ mnohich kirunkach praz dezynfarmacyju, raschistvańnie palityčnaj situacyi, padryŭ davieru i fizičnyja dziejańni — terakty, dyviersijnyja apieracyi, kibierataki na krytyčnuju infrastrukturu.
Asobnym pytańniem źjaŭlajecca vierahodnaść patencyjnaha nastupleńnia na Kijeŭ. My razhledzim hetaje pytańnie nižej, paśla acenki situacyi na mory.
Čornaje i Azoŭskaje mora
Situacyja ŭ Čornym mory praciahvaje źmianiacca z-za ŭzmacnieńnia mahčymaściaŭ Čarnamorskaha fłota Rasii karablami Cichaakijanskaha i Paŭnočnaha fłatoŭ. Tak, z 9 lutaha ŭ Čornym mory znachodziacca 12 vialikich desantnych karabloŭ z usich fłatoŭ RF.
Pavodle raźlikaŭ, na barty hetych desantnych karabloŭ moža być zahružana 2 bryhady marskoj piachoty z vajskovaj technikaj. Aryjencirovačna heta da 4 tysiač čałaviek i da 250 adzinak bronietechniki, što moža ŭjaŭlać pahrozu desantu na Čarnamorskim uźbiarežžy Ukrainy, u pryvatnaści ŭ Chiersonskaj vobłaści.
Razam z aeramabilnym i pavietranym desantam, siły jakoha skancentravanyja ŭ Krymie, heta moža stvarać pahrozu praviadzieńnia apieracyj rasijan na poŭdni Ukrainy. Karystajučysia značnaj vajennaj pieravahaj na mory i nasupierak mižnarodnamu pravu, RF budzie ažyćciaŭlać amal poŭnuju błakadu Čornaha i, vierahodna, Azoŭskaha moraŭ u pieryjad z 13 pa 19 lutaha na padstavie vučeńniaŭ z bajavymi strelbami. Dadzienaja pravakacyja źjaŭlajecca pravierkaj mahčymaściaŭ Rasii i nastupstvaŭ takich dziejańniaŭ.
Hetyja dziejańni, a taksama mahčymaść farmiravańnia siłaŭ dla vysadki desantu, buduć mierami, kab adciahnuć uvahu jak vajenna-palityčnaha kiraŭnictva Ukrainy, tak i suśvietnaj supolnaści.
Pakul prahnoz raźvićcia situacyi ŭ Čornym i Azoŭskim morach źjaŭlajecca niehatyŭnym, ale jon budzie vielmi zaležać ad reakcyi Ukrainy i asabliva suśvietnaj supolnaści na błakavańnie. Kali śviet žorstkim čynam nie adreahuje na takuju pravakacyju, jaje paŭtor źjaŭlajecca tolki pytańniem času.
Pytańni abarony Kijeva
Siońnia vialikaja častka ŭvahi ahladalnikaŭ pryviazanaja da pierśpiektyŭ abarony Kijeva.
Zrazumieła, što dla kramloŭskich stratehaŭ klučavaja meta ahresii — viartańnie poŭnaha kantrolu nad Ukrainaj. Jana budzie vyhladać praściejšaj u vypadku zachopu stalicy.
Sapraŭdy, rasijskija vajskovyja farmavańni na terytoryi Biełarusi razam z hrupoŭkami vojskaŭ na terytoryi RF stvarajuć pahrozu paŭnočnym abłaściam Ukrainy i Kijevu. Kolkaść siłaŭ i srodkaŭ źjaŭlajecca tearetyčna dastatkovaj dla realizacyi «Kijeŭskaha scenaryja». Ale tolki tearetyčna.
U vypadku sproby praryvu miažy ŭ Čarnihaŭskaj, Žytomirskaj i Kijeŭskaj abłaściach rasijskija vojski niasuć nieprymalnyja straty. Taki scenaryj vyhladaje zanadta ryzykoŭnym dla RF pry najaŭnaj abstanoŭcy.
Pa-pieršaje, scenaryj zachopu Kijeva jak u materyjalnym vymiareńni, tak i ŭ vymiareńni čałaviečych strataŭ nie źjaŭlajecca «bolš biudžetnaj» viersijaj poŭnamaštabnaha ŭvarvańnia, uličvajučy kolkaść i jakaść vojskaŭ i resursaŭ, zadziejničanych u abaronie stalicy Ukrainy.
Dla zachopu vuzłoŭ kamunikacyj (aeraporty, vakzały, masty) pavinny vykarystoŭvacca taktyčnyja pavietranyja desanty sa składu šturmavych padraździaleńniaŭ US RF, jakija mohuć być niejtralizavanyja najaŭnymi siłami biaśpieki i abarony Ukrainy.
Navat hetyja dziejańni nie majuć sensu bieź pieramiaščeńnia Rashvardyi i ahulnavajskovych čaściej dla ŭtrymańnia zachoplenaj terytoryi. Takoje nastupleńnie budzie vielmi pavolnym, bo treba prajści 100 km ad miažy praz šmatešałonnuju abaronu vojskaŭ Paŭnočnaha apieratyŭnaha kamandavańnia, uzmocnienych mahčymaściami Abjadnanych siłaŭ. Hetyja vojski hatovyja da supraćdziejańnia.
Pa-druhoje, atrymańnie kantrolu nad miehapolisam z nasielnictvam bolš za 3 miljony čałaviek, vialikaja kolkaść jakich hatovaja akazać supraciŭleńnie vorahu — zadača składanaja i małarealnaja, uličvajučy nieabchodnuju kolkaść vojskaŭ, jakich pakul nie nazirajecca.
Akramia taho, Kijeŭ vielmi niaprosta izalavać z-za jaho składanaj tapahrafii, i da jaho buduć prychodzić hrupy ruchu supracivu z usioj Ukrainy. Heta zrobić niemahčymym doŭhaje ŭtrymańnie voraham stalicy i, adpaviedna, mocna ŭpłyvaje na metazhodnaść rašeńnia adnosna sproby nastupleńnia.
Pa-treciaje, nadziei na padtrymku nastupleńnia RF z boku «piataj kałony» marnyja — heta nie 2014 hod.
Ukraina ŭžo viedaje što rabić z pasłuhačami Kramla prafiesijna, žorstka i chutka. Akramia hetaha, paśla akupacyi Kryma i błakady ARDŁA Rasija pazbaviła siabie mahčymaści padvozu «mabilizacyjnaha resursu» ŭ vyhladzie prapłačanych prarasijskich citušak. Rupary Maskvy nie majuć tych pieravah, jakija mieli 8 hadoŭ tamu.
Pa-čaćviortaje, tolki stratehi z aŭtarytarnym čynam myśleńnia mohuć raźličvać na pieravahi zachopu Kijeva. Na samaj spravie, demakratyčnaja Ukraina zmoža vystajać navat u vypadku zachopu stalicy.
Luby patencyjny «maryjanietkavy» ŭrad nie budzie pryznany ni ŭkraincami, ni śvietam. To-bok raźliki na toje, što, zachapiŭšy Kijeŭ, RF ustaluje kantrol nad Ukrainaj — bieskarysnyja.
Ale hałoŭnaje, što lubyja scenaryi zachopu Kijeva, jak ahulnavajskovyja, tak i z užyvańniem «śpiecyjalnych apieracyj» nie buduć niečakanymi.
Hatoŭnaść siłaŭ biaśpieki i abarony Ukrainy
Ukraina siońnia hatovaja da abarony krainy i Kijeva. Pry padrychtoŭcy hetaha artykuła my havaryli ź vialikaj kolkaściu słužbovych asob i možam paćvierdzić, što nichto nie ihnaruje pahrozu.
Sproby prarvacca ŭhłyb terytoryi Ukrainy sustrenuć vielmi istotny supraciŭ našych siłaŭ. Pavodle našych acenak, uzrovień hatoŭnaści Ukrainy ŭ apošni čas značna pavysiŭsia.
Pieršaje: značna vyras uzrovień zabieśpiačeńnia ŭzbrajeńniem, u tym liku za košt niadaŭna atrymanaha ad krain-partnioraŭ.
Druhoje: adbyłasia pieradysłakacyja častki ŭkrainskich vojskaŭ bližej da biełaruskich miežaŭ, usie mahli nazirać za treniroŭkami čaściej u paŭnočnych rehijonach i da taho padobnaha.
Treciaje: ciapier va Ukrainie prachodziać maštabnyja vučeńni, meta jakich zaklučajecca mienavita ŭ adpracoŭcy kaardynacyi dziejańniaŭ na vypadak adpaviednych scenaryjaŭ. Heta značyć, vojski Ukrainy ciapier znachodziacca ŭ stanie pavyšanaj bajavoj hatoŭnaści. Usio heta paćviardžaje, što vajenna-palityčnaje kiraŭnictva surjozna ŭsprymaje patencyjnyja pahrozy i pracuje ź imi.
Akramia taho, za apošni pieryjad pačali aktyŭna razhortvacca i treniravacca siły terytaryjalnaj abarony. Viadoma, my nie možam havaryć pra maksimalnuju ich hatoŭnaść, ale dziasiatki tysiač ludziej, maralna i fizična hatovych da supracivu, viedajuć, što im rabić u ekstrannaj situacyi i buduć dziejničać zładžana. Detali padrychtoŭki padajucca ŭ sumiesnaj zajavie ministra abarony i hałoŭnakamandujučaha USU.
Taki ŭzrovień padrychtoŭki śviedčyć ab tym, što realizacyja luboha z zajaŭlenych vyšej scenaryjaŭ, a asabliva zachop Kijeva, dla rasijan značna ŭskładniłasia.
U vypadku sproby takoj apieracyi ŭ ich uźniknuć značnyja prablemy ź pieramiaščeńniem ciažkaj techniki — dziakujučy ciopłamu nadvorju i hrazi, a kolkaść strataŭ abaviazkova budzie bačnaja šyrokaj hramadskaści, u tym liku i rasijanam, dziakujučy sacsietkam.
Ci hatovyja rasijanie bačyć karcinki pałajučaj techniki i sustrakać sotni ci tysiačy zahinułych suajčyńnikaŭ — rytaryčnaje pytańnie. Rejtynh kiraŭničaj viarchuški pieryjadyčna źnižajecca, a padtrymka «nieabchodnaści» vajny z Ukrainaj hramadzianami RF źjaŭlajecca stabilna nizkaj dziakujučy «strachu Vialikaj vajny».
U dadatak da hetaha, buduć imhnienna ŭklučanyja «piakielnyja» sankcyi, uzmocnicca akazańnie dapamohi Ukrainie. Najaŭnaść takich sankcyj stvoryć, u tym liku, pieradumovy dla kanfliktaŭ unutry elitaŭ RF.
Usie hetyja faktary robiać scenaryj pachodu na Kijeŭ małavierahodnym.
Pryčyny zajavaŭ suśvietnych lideraŭ
Dyk čamu ž amierykanskija čynoŭniki kažuć ab takim raźvićci padziej?
Pa-pieršaje, siarod mnohich namieraŭ RF mohuć być apieracyjnyja płany ab nastupleńni pa roznych scenaryjach, u tym liku — na Kijeŭ. RF mahła b ich zadziejničać u vypadku adsutnaści zhurtavanaści ŭkrainskaha nasielnictva, słaboj hatoŭnaści siłaŭ abarony i/abo adsutnaści mižnarodnaj padtrymki.
RF pastajanna karektuje i adaptuje płany, zychodziačy sa źmienlivaj situacyi, reakcyi Ukrainy i suśvietnaj supolnaści. Nie zabyvajemsia, što my znachodzimsia ŭ stanie hibrydnaj vajny, u jakoj infarmacyjnaje ŭździejańnie źjaŭlajecca častkaj napadu abo abarony.
Mabyć, našyja zachodnija partniory bačać u raskryćci infarmacyi ab namierach rasijskaha kiraŭnictva mahčymaść cisku i strymlivańnia: my viedajem pra vašych płany i rychtujemsia da ich.
Pierachop inicyjatyvy ŭ Kramla adnosna nastupnych krokaŭ i absalutnaje i nieparušnaje nieprymańnie idei pačatku Vialikaj vajny, hatoŭnaść imhnienna stvarać nieprymalnyja nastupstvy — heta toje, što strymlivaje Pucina.
Što ŭ hetych umovach rabić cyvilnamu nasielnictvu?
Naša hatoŭnaść da supracivu, sabranaść i adsutnaść paniki adyhryvajuć istotnuju rolu. Časam mienavita takija rečy vyrašajuć chod historyi.
Ciapier my bačym vielmi pravilnuju reakcyju nasielnictva. Niama paniki. Sacyjałahičnyja dadzienyja, jakija pastajanna abnaŭlajucca, śviedčać pra nieprymalnaść patencyjnaj akupacyi i hatoŭnaść da supracivu, navat pry takoj surjoznaj infarmacyjnaj chvali.
Ukraincy dakazvajuć sabie i śvietu surjoznuju i rašučuju hatoŭnaść abaraniacca. I heta mienavita toje, što źjaŭlajecca klučavym elemientam udałaj stratehii supracivu.
Čytajcie taksama:
Pahroza ŭvarvańnia Rasii va Ukrainu pavinna chvalavać kožnaha. Historyk Juval Noj Charary — pra toje, što čałaviectva moža stracić
Zamiežniki źjazdžajuć, ale Zachad nie hublaje nadziei na dypłamatyčnaje vyrašeńnie ŭ apošni momant. Što viadoma pra mahčymy napad Rasii na Ukrainu?
Arkadź Mošes: Usialakija razmovy pra «finlandyzacyju» pavinny spynicca, dla XXI stahodździa heta absalutna nieprymalna
«Maleńkaja pieramožnaja vajna» z Ukrainaj: ci dapamahła b jana Łukašenku?
David i Halijaf: paraŭnoŭvajem siły rasijskaj i ŭkrainskaj armij
Kali Kanapackaja stała całkam padkantrolnaja Łukašenku?22
Kamientary