Hienprakuror Ukrainy: Z Kijeŭščyny vyvieźli ŭžo 410 ciełaŭ zabitych mirnych žycharoŭ
Hienieralny prakuror Ukrainy Iryna Vieniadziktava paviedamiła, što na vyzvalenych terytoryjach Kijeŭščyny znachodziacca zvyšvažnyja dokazy žorstkich vajskovych złačynstvaŭ Rasii.
«Heta piekła, jakoje treba zadakumientavać, kab pakarać ludziej, jakija ŭčynili jaho na našaj ziamli. Padkreślu, pryciahnuć da adkaznaści ŭ nacyjanalnych, i ŭ mižnarodnych sudach», — źviartajecca jana.
Ź pieršych dzion vajny ofis hienprakurora sumiesna z SBU pracujuć nad kryminalnaj vytvorčaściu pa fakcie ździajśnieńnia palityčnym i vajennym kiraŭnictvam Rasijskaj Fiederacyi hienacydu ŭkrainskaha naroda. Asablivaja ŭvaha nadajecca najbolš masavym razbureńniam u Maryupali, nasielenych punktach Kijeŭskaj, Charkaŭskaj, Sumskaj, Čarnihaŭskaj, Łuhanskaj i Danieckaj abłaściej.
«Usia vyzvalenaja terytoryja padzielenaja na kvadraty, u kožnym ź jakich pracujuć śledča-apieratyŭnyja hrupy z prakuroraŭ, śledčych i apieratyŭnych supracoŭnikaŭ palicyi. Da praviadzieńnia ahladaŭ miescaŭ padziej pryciahvajucca inśpiektary-kryminalisty, vybuchatechniki, kinołahi, sudova-miedycynskija ekśpierty abo daktary. Napieradzie hetych kamand zaŭsiody DSNS — vorahi zaminiravali harady i vioski, zastałosia šmat bojeprypasaŭ, jakija nie vybuchnuli, jany pakinuli «raściažki» navat na trupach miascovych», — adznačaje Vieniadziktava.
Dla praviadzieńnia pieršačarhovych śledčych dziejańniaŭ na terytoryi tolki Bučanskaha rajona zaraz pracuje bolš za 50 supracoŭnikaŭ palicyi i prakuroraŭ.
U biuro sudmiedekśpiertyzy pastajanna dziažurać prakurory, śledčyja i sudovyja ekśpierty. Z terytoryi Kijeŭščyny ŭžo vyvieźli 410 ciełaŭ zabitych mirnych žycharoŭ, za 1—3 krasavika 140 ź ich užo ahledzieli prakurory i inšyja śpiecyjalisty.
«Paralelna idzie praca ź miascovym nasielnictvam, pošuk śviedak, paciarpiełych, zbor fota— i videadokazaŭ. Heta tonkaja i karpatlivaja praca: ludzi spałochanyja, stomlenyja, zakatavanyja, jany pieražyli žach, jaki niemahčyma apisać. I tut taksama treba čas i prafiesijny padychod, kab zafiksavać usio pravilna i nie ŭpuścić nivodnaha šancu znajści i pakarać vinavatych», — akcentuje prakuror.
Jana taksama zaklikaje nie sprabavać chajpić na trahiedyi.
«Tam užo pačynajuć źjaŭlacca čerhi nibyta achvotnych dapamahčy pravaachoŭnikam dakumientavać złačynstvy, a na samaj spravie — zasełficca na miescy trahiedyi. Dla ŭsich «pamočnikaŭ» paŭtaru — heta miesca złačynstva, dzie pavinny pracavać tolki prafiesijanały, kab nie parušyć abstavinaŭ, sabrać uvieś sapraŭdy nieabchodny materyjał pa mižnarodnych standartach», — tłumačyć Iryna Vieniadziktava.
Jana taksama źviartaje ŭvahu, što na vyzvalenych terytoryjach usio jašče niebiaśpiečna, pakolki rasijskija vojski šmat što zaminiravali, mnohija bojeprypasy nie zdetanavali.
Kamientary