Udzielniki rynku kažuć, što kampanija takim čynam spadziajecca paźbiehnuć defołtu pa rasijskich ablihacyjach, bo nie maje inšaj mahčymaści pierakredytavacca.
Novyja ablihacyi vypuščanyja na sumu 5 miljonaŭ dalaraŭ.
Kaštuje adna ablihacyja 1000 dalaraŭ, vypłata prybytku i pahašeńnie robiacca ŭ biełaruskich rublach.
«Im dziavacca niama kudy — u ich chutka pačynajucca vypłaty pa rasijskich ablihacyjach, a srodkaŭ na pahašeńnie nie chapaje. Aścierahajucca defołtu i sprabujuć pierakredytavacca. Ale biełaruskija banki im nie dajuć — «Jeŭraopt» dla ich vielmi vialiki. Rasija ž nie daść vypuścić ablihacyi na svaim rynku da pahašeńnia papiarednich.
Tamu sprabujuć choć niejak pierakredytavacca na ŭnutranym rynku. Kab aktyŭniej išło — dali nierealnuju staŭku», — ścisła patłumačyła sutnaść dziejańniaŭ «Jeŭraopta» abaznanaja krynica.
U 2019-m «Jeŭraopt» infarmavaŭ pra vypuski ablihacyj na rasijskim rynku na sumu 10 miljardaŭ rasijskich rubloŭ. Pa infarmacyi na sajcie kampanii, rasijskich ablihacyj u ich ahułam na 18,5 miljarda rasijskich rubloŭ.
Hrafik ich pahašeńnia, imavierna, raściahnuty ŭ časie.
Napačatku miesiaca «Jeŭrahandal» (asnoŭnaja jurydyčnaja adzinka kampanii) apublikavaŭ spravazdačnaść za minuły hod: buchhałtarski bałans i spravazdaču ab stratach i prybytkach.
Kampanii ŭdałosia trochu skaracić «doŭhija» zapazyčanaści, ale adnačasova z hetym naraśli «karotkija» (jakija treba addać ciaham bližejšych 12 miesiacaŭ) — ciapier ich 815,8 miljona rubloŭ. «Doŭhich» daŭhoŭ zastajecca bolš jak na paŭtara miljarda biełaruskich rubloŭ — 1 młrd 623 młn.
Prybytak raście amal što ŭ adnym tempie ź inflacyjaj.
Kredyty ŭ valucie ličacca analitykami najbolšaj prablemaj kampanii, jakaja «źjadaje» istotnuju častku prybytku.
U kampanii «Jeŭraopt» (nie błytać z «Jeŭrahandlem», biznes brenda raźniesieny pa roznych kampanijach, «Jeŭraopt» zajmajecca nieruchomaściu) u anałahičnaj spravazdačnaści bačnaja prasadka pa čystym prybytku, a taksama, anałahična, skaračeńnie «doŭhaj» kredytnaj nahruzki i pavieličeńnie «karotkaj», jakuju treba spłacić ciaham hodu — 23 miljony rubloŭ.
Čytajcie taksama: Straty 126 miljonaŭ, u biznes-kołach kažuć pra mahčymy prodaž rasijskamu «Mahnitu». Što adbyvajecca ź Jeŭraoptam?
