Hałoŭčanka hatovy davać małomu i siaredniamu biznesu kredyty pad impartazamiaščeńnie
Premjer-ministr Raman Hałoŭčanka raźličvaje, što impartazamiaščeńniem u Biełarusi buduć zajmacca nie tolki bujnyja dziaržpradpryjemstvy, ale taksama mały i siaredni biznes. Pra heta jon zajaviŭ siońnia ŭ chodzie vizitu ŭ Miadzielski rajon, paviedamlaje pres-słužba ŭrada.
Kiraŭnik urada zajaviŭ, što rašeńni ab impartazamiaščeńni byli pryniatyja daŭno, ale ŭviadzieńnie sankcyj paskoryła praces.
«Takoj pradukcyi płanavałasia vypuścić na 25 młrd dalaraŭ unutry krainy. Viadoma, my ciapier paskarajemsia, dziejničajem chutčej. Dadamo jašče kala 2 młrd da hetaj sumy. U nas ciapier 27 novych prajektaŭ, jakija ŭniesienyja ŭ Bank raźvićcia dla dadatkovaha finansavańnia», — zajaviŭ Hałoŭčanka.
Jon čakaje, što impartazamiaščeńniem zacikaviacca małyja i siarednija pradpryjemstvy pryvatnaha siektara i prapanuje im skarystacca kredytami Banka raźvićcia z «ekskluziŭnaj staŭkaj».
«My razumiejem, što heta patrabuje peŭnych układańniaŭ, niejkich namahańniaŭ. U suviazi z hetym urad śpiecyjalna dla padtrymki tych pradprymalnikaŭ, jakija chočuć iści ŭ impartazamiaščeńnie, jakija chočuć raźvivać vytvorčuju dziejnaść, praduhledzieli pačatkovuju prahramu, jakaja startavała ź lutaha hetaha hoda.
Bank raźvićcia hatovy davać jak ahient urada kredyt dla realizacyi takich prajektaŭ z maksimalnaj sumaj da 2,5 młn rubloŭ i pad vielmi vyhadnuju staŭku. Skažam tak, pad ekskluziŭnuju staŭku, jakaja ciapier składvajecca faktyčna nižejšaj za ŭzrovień inflacyi», — raskazaŭ Hałoŭčanka.
Pavodle jaho słovaŭ, ciapier jość 16 pretendentaŭ na atrymańnie kredytaŭ, ale bank maje resursy dla značna bolšaj kolkaści prajektaŭ.
Ciapier čytajuć
«Siadzieŭ užo 50 sutak, zatrymali jaho dziaŭčynu i brata». Sukamiernik raskazaŭ pra radyjoamatara, aryštavanaha za zdradu dziaržavie4
Kamientary