Z 25 žniŭnia pa 10 vieraśnia ŭpraŭleńnie Dziaržaŭtainśpiekcyi MUS Biełarusi pravodzić pa ŭsioj krainie śpiecyjalnyja kompleksnyja mierapryjemstvy «Uvaha — dzieci!».
Ich meta — prafiłaktyka darožna‑transpartnych zdareńniaŭ z udziełam maleńkich pasažyraŭ, piešachodaŭ i viełasipiedystaŭ, pryciahnieńnie ŭvahi hramadskaści da prablemy hibieli i traŭmavańnia dziaciej na darohach.
Jak paviedamili BiełaPAN va UDAI MUS, u 2009 hodzie ŭ Biełarusi pa stanie na 23 žniŭnia ŭ vyniku DTZ zahinuli 27 i traŭmavanyja 395 dziaciej. Heta mienš, čym na anałahičnuju datu ŭ 2008 hodzie.
Padčas śpiecyjalnych mierapryjemstvaŭ arhanizujucca vystupleńni inśpiektaraŭ DAI va ŭstanovach adukacyi, a taksama dziažurstvy baćkoŭ vučniaŭ z supracoŭnikami Dziaržaŭtainśpiekcyi ŭ miescach intensiŭnaha ruchu školnikaŭ praz prajeznuju častku. Kala dziciačych sadkoŭ, škoł, himnazij i licejaŭ budzie pracavać patrulny transpart DAI, abstalavany ŭstanoŭkami‑hučnahavarycielami. Praź ich supracoŭniki milicyi buduć davać rekamiendacyi pa biaśpiečnych pavodzinach dziaciej na vulicach. Aprača taho, pa ŭsioj krainie patrulavańnie aŭtadaroh budzie ažyćciaŭlacca va ŭzmocnienym režymie.
Padčas prafiłaktyčnych mierapryjemstvaŭ DAI rekamienduje vadzicielam ruchacca z uklučanym śviatłom far.
