Namieśnica dziaržsakratara ZŠA Vendzi Šerman (źleva) i Śviatłana Cichanoŭskaja
Śviatłana Cichanoŭskaja sustrełasia ŭ Złučanych Štatach z namieśnicaj dziaržsakratara ZŠA Vendzi Šerman. Da častki sustrečy taksama dałučyŭsia dziaržsakratar ZŠA Entani Blinkien.
Na sajcie Dziaržaŭnaha departamenta ZŠA paviedamlajecca: «Jany abmierkavali padtrymku, jakuju režym Łukašenki praciahvaje akazvać niespravakavanaj vajnie Rasii suprać Ukrainy, i namahańni ZŠA pryciahnuć režym da adkaznaści, a taksama niaspynnaje zdušeńnie pravoŭ čałavieka i demakratyčnych svabod».
Da častki sustrečy taksama dałučyŭsia dziaržsakratar ZŠA Entani Blinkien (druhi sprava)
Taksama abmiarkoŭvałasia situacyja z palitviaźniami. Vendzi Šerman padkreśliła, što Złučanyja Štaty praciahvajuć akazvać padtrymku demakratyčnym pamknieńniam biełaruskaha naroda.
Taksama Cichanoŭskaja sustrełasia ŭ Vašynhtonie sa śpikieram nižniaj pałaty parłamientu ZŠA Nensi Pełosi.
«Na siońniašniaj sustrečy z Nensi Pełosi ŭ Vašynhtonie my pahadzilisia z tym, što Biełaruś pavinna być najvyšejšym pryjarytetam dla Złučanych Štataŭ. Demakratyčny śviet pavinien abjadnacca pierad abliččam tyranii. My čakajem ad ZŠA mocnaha lidarstva i rašučych mieraŭ», — paviedamiła Cichanoŭskaja ŭ Twitter pa vynikach sustrečy.
Taksama Śviatłana Cichanoŭskaja sustrełasia z amierykanskimi sienatarami — pradstaŭnikami Demakratyčnaj partyi Džyn Šahin (ad štata Ńju-Hempšyr), Krysam Van Holenam (ad štata Meryłend), Ronam Džonsanam (štat Viskonsin), Ryčardam Durbinym (štat Ilinojs) i pradstaŭnikom Respublikanskaj partyi sienataram Lindsi Hremam (štat Karalina).
«Ja padkreśliła, što padtrymka Biełarusi zaklučajecca ŭ spałučeńni sankcyj suprać režymu i dapamohi ludziam», — adznačyła Cichanoŭskaja, havoračy pra sustreču ź sienatarami.
