Słavakija vystupaje za źnižeńnie koštaŭ na šenhienskija vizy dla biełarusaŭ
Minsk bližejšym časam naviedaje kiraŭnik MZS Słavakii Jarasłaŭ Łajčak.
Z nahody hadaviny Słavackaha paŭstańnia i dnia Kanstytucyi z žurnalistami sustreŭsia nadzvyčajny i paŭnamocny pasoł Słavackaj Respubliki ŭ Biełarusi Maryjan Siervatka.
Heta adnosna novy dypłamat u našaj krainie, ź misijaj u Minsku jon znachodzicca tolki hod. Da hetaha sp.Siervatka źjaŭlaŭsia ambasadaram u Polščy.
Pramovu Maryjan Siervatka pačaŭ ź nievialikaha kazusu, jon pavinšavaŭ žurnalistaŭ z vydatnym vystupam zbornaj Biełarusi na čempijanacie śvietu pa lohkaj atletycy. A tam naša kamanda nie ŭziała nivodnaha miedalu.
Razmaŭlaŭ dypłamat na rasijskaj movie, na jakoj, pa ŭłasnamu pryznańniu, nie razmaŭlaŭ bolš za 40 hadoŭ, ale paabiacaŭ vyvučyć i biełaruskuju, jak jahony papiarednik Lubamir Rehak.Uvohule, spadar pasoł niekalki padkreślivaŭ nadzvyčajnaje padabienstva našych movaŭ. Jon navat choča arhanizavać navukovyja daśledavańni adnosna rodnaści našych movaŭ. Maryjan Servatka taksama adznačyŭ padabienstva biełaruska‑słavackaj tapanimiki.
«Niekali my byli vielmi blizkimi. My chočam być blizkimi i ciapier», — skazaŭ pasoł.
Słavakija vystupaje za źnižeńnie koštaŭ na šenhienskija vizy dla biełarusaŭ amal udvaja, zapeŭniŭ Maryjan Siervatka, ale treba zhoda ŭsich krain Jeŭrasajuzu. Letaś słavackaje pasolstva vydzieliła 1200 biaspłatnych vizaŭ dla hramadzian Biełarusi.
Maryjan Siervatka vykazaŭ radaść tymi palityčnymi pracesami, jakija apošnim časam adbyvajucca ŭ Biełarusi. Stanoŭča acaniŭ siabroŭstva Biełarusi ŭ prahramie «Uschodniaje partniorstva».
Užo ciapier pačynaje realizoŭvacca prajekt «Padtrymka transfarmacyi rehijanalnaha pradprymalnickaha asiarodździa». Na hetuju inicyjatyvu MZS Słavakii vydatkavaŭ 116 tysiač jeŭra.
Ahułam tavarazvarot pamiž našymi krainami skłaŭ letaś 174,6 miljonaŭ jeŭra. Sioleta jon nie adpaviadaje minułahodnim tempam.
Bližejšym časam płanujecca vizit u Minsk ministra zamiežnych spravaŭ Słavakii Jarasłava Łajčaka. Maryjan Siervatka nie nazvaŭ kankretnyja daty. Tym nie mienš, jon vykazaŭ spadziavańnie, što ministr voźmie ŭdzieł u adkryćci vystavy słavackich mastakoŭ‑prymityvistaŭ ź Sierbii, jakaja adkryjecca ŭ Nacyjanalnym muziei 7 vieraśnia.
Naprykancy dypłamat zaprasiŭ biełarusaŭ čaściej naviedvać słavackija kurorty.
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier

Kamientary