Haradskaja rada Ryhi kančatkova pryniała rašeńnie demantavać manumient «savieckim voinam-vyzvalicielam». Pra rašeńnie havorycca na sajcie rady. Za jaho prahałasavali 38 deputataŭ, suprać — 7.
Deputaty daručyli Departamientu raźvićcia horada, Departamientu ŭłasnaści i Ryžskaj municypalnaj palicyi dapamahčy ahienctvu ryžskich pomnikaŭ z demantažom savieckaha miemaryjała.
Paśla hałasavańnia prykładna 200 čałaviek sabralisia ŭ centry horada, vystupajučy suprać znosu manumienta. Pavodle źviestak vydańnia Delfi, palicyjanty zatrymali siamioch čałaviek, u tym liku lidara Sajuza ruskich Łatvii i deputata Jeŭraparłamienta Taćcianu Ždanok.
Napiaredadni, 12 maja, Siejm Łatvii prahałasavaŭ za prypynieńnie dziejańnia 13-ha artykuła łatvijska-rasijskaj damovy, jakaja zabiaśpiečvała zachavańnie miemaryjalnych zbudavańniaŭ i takim čynam źniali jurydyčny barjer na šlachu da znosu pomnika ŭ Ryzie. Ciapier rašeńnie kančatkova zaćvierdziła haradskaja rada.
Miemaryjalny kompleks, jaki nazyvajuć «Pomnik voinam Savieckaj Armii — vyzvalicielam savieckaj Łatvii i Ryhi ad niamiecka-fašysckich zachopnikaŭ», adkryli ŭ 1985 hodzie. Heta amal 80-mietrovaja kałona z załatymi zorkami, kala jakoj stajać skulptury savieckich sałdat i Radzimy-maci.
Kamientary