Pad Dokšycami adbudavali staradaŭniuju kaplicu + foty

26 žniŭnia biskup viciebski Uładzisłaŭ Blin nanova aśviaciŭ kapličku na byłoj siadzibie Kozieł‑Pakleŭskich u Hniaździłavie.

Kaplica vykonvała funkcyju pachavalnaha sklepa Šyškaŭ i Kozieł‑Pakleŭskich. Miascovyja staražyły raspaviadali, što tam stajali čatyry truny: try vialikija i adna maleńkaja. Sapraŭdnaje dzikunstva było zroblena studentami‑kamsamolcami ŭ kamunistyčnyja časy. Usie truny byli ŭskrytyja i potym płavali pa voziery. Studentami kaplica vykarystoŭvałasia jak skład dla spartovaha invientaru. A potym jana ŭvohule pryjšła ŭ zapuścieńnie.

Namahańniami probašča dokšyckaj parafii Sv. Trojcy a. Marka OFMCap kaplica pačała abudžacca ad doŭhaha snu. Raspačałasia poŭnaja rekanstrukcyja. Byŭ zrobleny novy bliskučy kupał, pakładziena novaja padłoha, adramantavana stol. Taksama pobač z kaplicaj źjaviłasia fihurka Maci Božaj, da jakoj miascovyja žychary prychodzili i prychodziać malicca. Asabliva praca kipieła ŭ apošnija dni. Amal kožny dzień kala kaplicy pracavali miascovyja žychary, a taksama vierniki dokšyckaha kaścioła.

Mnie samomu daviałosia papracavać u Hniaździłavie i mahu skazać, što sprava nialohkaja. Davoli časta pryjazdžali ludzi z roznych kutočkaŭ Biełarusi da svaich rodnych i abaviazkova zachodzilisia pahladzieć na novaje žyćcio kaplicy.

I voś maleńni vioski Hniaździłava byli pačutyja: nastupiŭ śviatočny dzień paśviačeńnia kaplicy. Vierniki dokšyckaj parafii sv. Trojcy zładzili pilihrymku na čale z a. Markam, kab padaravać abraz Jezusa Miłasernaha (mastak V. Ščasny) adrodžanaj kaplicy. 26 žniŭnia hniaździłaŭčanie zapomniać nazaŭsiody: Jaho Eksielencyja biskup Uładzisłaŭ Blin aśviaciŭ adrodžany Božy Dom. Śviataja Imša, jakuju celebravaŭ biskup, sabrała šmat ludziej, siarod jakich byli zaprošanyja dypłamaty z polskaha konsulstva.

Ad žycharoŭ Hniaździłava hučali słovy padziaki a. Marku za adnaŭleńnie śviatyni, ksiandzu‑biskupu za malitvy, pracaŭnikam za ich samaaddanaść u spravie ramontu. Taksama hučali słovy nadziei na duchovaje adradžeńnie vioski.

Admietnym momantam uračystaści stałasia ŭručeńnie padziak z ruk Jaho Eksielencyi tym ludziam, jakija paspryjali adradžeńniu kaplicy. Siarod ich mastak i architektar Valeryj Ščasny, pracaŭniki, vierniki, jakija dapamahali materyjalna, dyrektar miascovaha kałhasu i inš. Imša, jakaja pačałasia a 19.00, skončyłasia pozna viečaram, ludzi razychodzilisia i raźjazdžalisia z uśmieškami i słovami radaści: narešcie adbyłosia! Dyk niachaj ža śviatynia słužyć žycharam Hniazdiłava tolki na słavu Božuju!

Pavał Malužaniec, Dokšycy; fota Kastusia Šytala i Catholic.by

• 0
• 0
• 0
• 0
• 0
• 0
• 0
• 0