Suchahruz Arctic Sea vioz rasijskija zienitna‑rakietnyja kompleksy ŭ Iran. Ździełcy pieraškodziła izrailskaja vyviedka «Masad». Jana ž dapamahła Kramlu zachavać tvar u hetaj historyi, piša łondanskaja «Times».
Izrailskija i rasiejskija krynicy, jakich cytuje Times, śćviardžajuć, što zienitna‑rakietnyja kompleksy S‑300 byli pahružanyja na bort Arctic Sea, kali sudna «ramantavałasia» u Kalininhradzie. Rakiety Iranu niby pradali byłyja aficery Kalininhradskaha harnizona, źviazanyja z złačynnym śvietam.
Krynicy ŭ Maskvie vykazali zdahadku, što ŭ arhanizacyi nalotu na suchahruz mahła ŭdzielničać izrailskaja «Masad», vykarystoŭvajučy dla hetaha padstaŭnych asob, jakija, chutčej, nie vałodali ŭsioj infarmacyjaj.
«Times» pryvodzić słovy byłoha rasiejskaha vajskoŭca: «Lepšy dla izrailcian sposab pieraškodzić hruzu dasiahnuć Irana — heta ŭčynić šumichu vakoł sudna. Jak tolki stała viadoma ab «pirackim nalocie», dla handlaroŭ zbrojaj hulnia skončyłasia. Rasiejcam pryjšłosia dziejničać.Voś čamu ja nie vyklučaju, što za vykradańniem sudna staić «Masad». Jon sarvaŭ pastaŭku rakiet i daŭ Kramlu mahčymaść pradstavić spravu tak, byccam jaho VMF pravioŭ bliskučuju apieracyju pa vyratavańni sudna».
Luboje śviedčańnie, što Kreml dazvoliŭ lepšym madelam rasiejskaj zbroi patrapić u ruki złačyncaŭ abo być pradadzienymi Iranu, było b vielmi chvaravitym dla samalubstva rasiejskich uład, piša hazieta. «Aficyjnaja viersija prosta śmiešnaja, jana była prydumanaja, kab dać Kramlu mahčymaść zachavać tvar, — paviedamiła Times rasiejskaja krynica. — Ja razmaŭlaŭ ź ludźmi, blizkimi da śledstva, i jany paćvierdzili ŭdzieł «Masada». Śmiešna dumać, što ŭvieś hety šum padniaŭsia z‑za hruzu draŭniny. Nie ja adzin upeŭnieny, što tam była zbroja dla Irana».
Izrailskija vajennyja krynicy paviedamili haziecie, što rašeńnie prainfarmavać Maskvu ab pastaŭcy zbroi było pryniata paśla atrymańnia infarmacyi ab jaje pahruzcy na bort suchahruza ŭ Kalininhradzie.Jak piša «Times», «Masad» paviedamiŭ rasiejskamu ŭradu, što aficery ŭ Kalininhradzie pierajšli «čyrvonuju rysu». Tady Kreml nakiravaŭ na pierachop sudna vartavyja karabli i atamnyja padvodnyja łodki, kab pierachapić kantrabandny hruz, a pa chodzie spravy była składzienaja historyja ab vykradańni sudna.
Hazieta nahadvaje, što na nastupny dzień paśla «vyratavańnia» sudna raspačaŭsia vizit u Rasieju prezidenta Izraila Šymana Pieresa. Pieres abmierkavaŭ temu pastavak zbroi voraham Izraila, a zatym jaho kancylaryja zrabiła zajavu, što prezident Rasiei Dźmitryj Miadźviedzieŭ abiacaŭ nie pastaŭlać zbroju Iranu i Siryi.
