U ofisie handlovaj sietki OMA prachodzić pieratrus — pad budynkam stajać čornyja busy, paviedamlajuć supracoŭniki. Bujny akcyjanier sietki raniej prypyniŭ dziejnaść u Biełarusi, kampanija pierastała zakuplać biełaruskija i rasijskija tavary z-za napadu Rasii na Ukrainu, nahadvaje Zerkalo.io.
Pra pieratrusy ŭ hałaŭnym ofisie ananimna paviedamili dva supracoŭniki kampanii, rabotnik adnoj z kram sietki raspavioŭ, što charakternyja dla siłavikoŭ mašyny la budynka zaŭvažyŭ kurjer.
— Kaža, na hałoŭnym ofisie staić šmat čornych busaŭ. U ich užo nikoha nie było, siłaviki ŭžo ŭ ofisie, jak my zrazumieli. U kramie ŭsio spakojna, pracujem jak zvyčajna. Nichto ničoha nie kaža, kali b nie kurjer, jaki pryjechaŭ i nam pra heta skazaŭ, to naohuł cišynia. Nichto b ničoha i nie viedaŭ. Mabyć, jašče adna kampanija trapiła ŭ niałasku, — napisaŭ małady čałaviek.
Pa słovach druhoha supracoŭnika «OMA», jaho kalehi, jakija ŭ hety čas pavinny znachodzicca ŭ budynku, nie vychodziać na suviaź. Adkazvajuć tolki tyja, chto doma. Jon taksama kaža, što bačyŭ mikraaŭtobusy. Zaŭvažyŭ, što jany byli bieź dziaržnumaroŭ.
— Minimum try, — udakładniaje jon. — Na parkoŭcy — supracoŭniki ŭ ekipiroŭcy. U adnaho ja bačyŭ vialikimi litarami na plačy nadpis «KDB». U nas vaśmipaviarchovy budynak, arandavany, ale całkam zaniaty OMA. Unutry moža być šmat čałaviek.
Zerkalo nie ŭdałosia źviazacca z kiraŭnictvam. U kantakt-centry pakul nie viedajuć, što adbyvajecca ŭ hałoŭnym ofisie, tam nie zmahli paćvierdzić hetuju infarmacyju.
— Mahčyma, ale nam nie dajuć takuju infarmacyju. My znachodzimsia dystancyjna, — adkazali pa telefonie.
Nahadajem, u siaredzinie maja stała viadoma, što finska-litoŭskaja kampanija «Kesko Senukai» prypyniła dziejnaść u Biełarusi i vychodzić sa składu akcyjanieraŭ handlovaj sietki OMA. Płanavałasia, što prodaž doli zavieršać u najbližejšy čas, adnak kankretnyja terminy nie paviedamlalisia. Usie handlovyja adnosiny ź biełaruskaj sietkaj byli spynienyja jašče ŭ krasaviku. Akramia taho, kampanija prypyniła zakupki rasijskich i biełaruskich tavaraŭ. Pryčyna takoha rašeńnia — rasijskaje ŭvarvańnie va Ukrainu.
Kamientary