Siońnia kiraŭnik «DNR» Dzianis Pušylin adpraviŭ u adstaŭku raniejšaha «premjer-ministra» Alaksandra Anančanku, prapanavaŭšy jamu «ŭznačalić raźvićcio dziaržsiektara». A vykanaŭcam abaviazkaŭ kiraŭnika «ŭrada DNR» pryznačany Vital Chacenka.
Chacenka — uradženiec ukrainskaha Dnieprapiatroŭska (ciapier Dniapro), ale ŭsiu karjeru jon budavaŭ u Rasii, tam vučyŭsia, tam i pracavaŭ. U 2013 hodzie byŭ pryznačany ministram enierhietyki, pramysłovaści i suviazi Staŭrapolskaha kraja, a ŭ 2019-m staŭ dyrektaram departamienta pramysłovaj palityki i prajektnaha kiravańnia Ministerstva pramysłovaści i handlu Rasii.
Chacenka — čałaviek pieršaha namieśnika kiraŭnika Administracyi prezidenta Siarhieja Kiryjenki, jaki z pačatku rasijskaha ŭvarvańnia va Ukrainu kuryruje ŭ Kramli samaabvieščanyja respubliki i inšyja akupavanyja Rasijaj ukrainskija terytoryi. Niezdarma i pryznačeńnie Chacenki adbyłasia jakraz u toj čas, kali Kiryjenka pryjechaŭ na akupavanyja Rasijaj terytoryi Ukrainy z čarhovaj kamandziroŭkaj.
Praŭda, u takoj kadravaj palitycy Rasii ŭ dačynieńniach z samaabvieščanymi i nibyta pryznanymi joj respublikami ničoha novaha niama. Varta pryhadać, što ŭ 2009—2012 hadach kiraŭnikom urada ŭžo farmalna pryznanaj Rasijaj u jakaści niezaležnaj dziaržavy Paŭdniovaj Asiecii byŭ rasijski čynoŭnik Vadzim Broŭcaŭ, jaki śpiecyjalna dla hetaha tudy pryjechaŭ. A ŭ 2011—2012 hadach Broŭcaŭ navat čatyry miesiacy vykonvaŭ abaviazki «prezidenta Paŭdniovaj Asiecii».
