Homielski abłasny sud razhladaje na vyjaznym pasiadžeńni ŭ Mazyry kryminalnuju spravu ŭ dačynieńni da 45-hadovaha vajskovaha piensijaniera i jaho 21-hadovaha syna, žycharoŭ Žłobina, jakija abvinavačvajucca ŭ zabojstvie vadziciela-dalnabojščyka i razbojnym napadzie na mahazin.
Jak paviedamili BiełaPAN u Homielskim abłasnym sudzie, abvinavačanyja byli zatrymany 12 lutaha. Było ŭstanoŭlena, što 3 lutaha jany ŭčynili razbojny napad na mahazin u Śvietłahorskam rajonie, nanieśli ciažkija cialesnyja paškodžańni pradaŭcam i vykrali hrošy — prykładna 300 tys. rubloŭ.
Hetyja ž asoby 6 lutaha napali na vadziciela-dalnabojščyka ŭ Jelskim rajonie i žorstka jaho zabili. Złačynstva ŭčyniena niedaloka ad pahraničnaha punkta na miažy z Ukrainaj. Vadziciel pierasiek miažu, spyniŭsia na zapravačnaj stancyi, da jaho padyšli złačyncy ŭ formie pahraničnikaŭ i pasprabavali prad`iavić dakumienty. Zatym abvinavačanyja nakinulisia z nažom na vadziciela i zabili jaho, zabrali mabilnyja telefony. 25-hadovy chłopiec, achviara złačyncaŭ, byŭ žycharom Kryčava Mahiloŭskaj vobłaści.
Na śledstvie abvinavačanyja rastłumačyli, što vajskovy piensijanier, amatar kazino, mieŭ šmat pazykaŭ — jon braŭ kredyty i zajmaŭ hrošy ŭ znajomych, bo zachaplaŭsia hulniavymi aŭtamatami. Kab viarnuć pazyki i kredyt, svajaki advažylisia na złačynstva.
Čakajecca, što prysud budzie abvieščany na nastupnym tydni.
