U Jehipcie akuły napadajuć na turystaŭ. Ekśpiert nazyvaje vierahodnyja pryčyny

Abodva napady adbylisia la ŭźbiarežža zaliva Sachl Chašyš. Pieršaj paciarpiełaj stała 68-hadovaja hramadzianka Aŭstryi. U vyniku napadu žančyna straciła ruku i nahu. Nieŭzabavie paśla špitalizacyi jana pamierła. Cieła druhoj achviary vyłavili z vady praź niekalki hadzin. Turystcy z Rumynii było kala 40 hadoŭ. Jaje traŭmy śviedčyli ab napadzie drapiežnika.

Pavodle Jakuba Kordasa, kiraŭnika afrykaryjuma Urocłaŭskaha zaaparka, abodva napady moh ździejśnić adzin i toj ža drapiežnik.

— Ja dumaju, što my daviedajemsia bolš praź niekalki tydniaŭ, tamu što treba, siarod inšaha, sabrać jak maha bolš danych, uklučajučy identyfikacyju vyhladu akuły, jakaja napała. Dla hetaha nieabchodnyja śpiecyjalnyja daśledavańni. Śpiecyjalisty ŭ hetym typie padziej zdolnyja vyznačyć vid, jaki napaŭ, naprykład, pa śladach ad zuboŭ, — tłumačyć jon.

Napady redkija, ale zdarajucca

U apošnija hady napady akuł byli adnosna redkimi ŭ prybiarežnym rehijonie Čyrvonaha mora Jehipta.

U 2020 hodzie ŭkrainski chłopčyk straciŭ ruku, a jehipiecki ekskursavod — nahu. Čamu dźvie žančyny zahinuli ŭ adzin dzień? Ekśpiert nazyvaje try mahčymyja pryčyny.

Pieršaja hipoteza zaklučajecca ŭ tym, što achviary nieśviadoma trapili na terytoryju akuł. Padazraju, što ŭ abodvuch vypadkach napad ździejśniła adna i taja ž akuła. Zdareńni raździalała nievialikaja adlehłaść, tamu pieršapačatkova možna zrabić takuju vysnovu.

Akuła mahła adčuć niejkuju pahrozu, i tamu napała. Varta pamiatać, što akuły napadajuć na ludziej u bolšaści vypadkaŭ nie tamu, što chočuć nas zabić, a tamu, što im u niejkaj stupieni cikava ci jany zahnanyja ŭ kut našaj prysutnaściu. Akuła nie napadaje, kab zabić i zžerci čałavieka. Śmierć vielmi časta nastupaje ŭ vyniku kryvacioku, tamu što rany — pa zrazumiełych pryčynach — mohuć być značynymi, — kaža ekśpiert.

Ludzi redka byvajuć ježaj dla akuł

Choć napady akuł na ludziej dziela ježy nadzvyčaj redkija, całkam vyklučać takuju situacyju nielha. U 2010 hodzie na kurorcie Čyrvonaha mora ŭ Jehipcie adbyłosia niekalki žudasnych zdareńniaŭ. Adzin čałaviek zahinuŭ i čaćviora atrymali ranieńni ŭ vyniku napadaŭ akuł.

Tady ekśpierty pryjšli da vysnovy, što ataki byli vyklikanyja praźmiernym vyłavam ryby, u vyniku čaho dla drapiežnikaŭ było zanadta mała naturalnaj ježy.

— Varty ŭvahi toj arhumient, što mory i akijany puściejuć. Nieabchodna pamiatać, što naturalnaja charčovaja baza akuł skaračajecca z pahroźlivaj chutkaściu. Zapasy ryby i bieschrybtovych skaračajucca na praciahu mnohich hadoŭ, a navakolnaje asiarodździe akijanaŭ paharšajecca. Kali ŭ hetaj miascovaści pryrodnyja miescy karmleńnia byli źniščanyja, akuła mahła b atakavać ludziej u pošukach ježy. Adnak vierahodnaść takoha scenaryja, na maju dumku, vielmi małaja, — adznačaje Kordas.

Mahčyma, akuł zavabili śpiecyjalna

— Jość i treci varyjant, choć Jehipiet daŭno abviaściŭ baraćbu z padobnaj praktykaj, — dadaje ekśpiert. — U svoj čas było vielmi papularna zavablivać roznyja drapiežnyja vidy, kidajučy ŭ vadu dochłuju rybu. Usio heta dla taho, kab zabiaśpiečyć turystaŭ dadatkovymi atrakcyjonami. Takim čynam pryciahnuli i akuł, jakija zjaŭlajucca vielmi razumnymi žyviołami i chutka zasvojvajuć, što ježa zjaŭlajecca ŭ vadzie razam ź ludźmi. Ułady hadami zmahajucca z takoj praktykaj, i štrafy vielmi vysokija. Adnak isnuje vierahodnaść taho, što niechta niezakonna sprabavaŭ pavialičyć pryvabnaść hetaha miesca, što skončyłasia trahična.

U subotu ŭłady Jehipta vyrašyli zakryć niekalki plažaŭ na hetym učastku ŭźbiarežža Čyrvonaha mora. Taksama była stvoranaja śpiecyjalnaja kamisija dla vyvučeńnia abstavinaŭ abodvuch napadaŭ.

— Mahčyma, śpiecyjalisty znojduć adkaz, čamu tak adbyłosia. Heta vielmi niepryjemnaja situacyja i vialikaja trahiedyja. Varta pamiatać, što kali my zachodzim u vadu ŭ miescach, dzie sustrakajucca akuły, takaja vierahodnaść jość zaŭsiody, ale vierahodnaść napadu akuły na čałavieka minimalnaja! — kaža ekśpiert.

• 15
• 0
• 3
• 7
• 32
• 16
• 7
• 0