Ułady Hiermanii razhladajuć mahčymaści spraścić pracedury atrymańnia vizaŭ dla pracaŭnikoŭ ličbavaj industryi ź Biełarusi i Rasii. Ciapier na rynku pracy hetaj krainy nie chapaje kala 100 tysiačaŭ IT-śpiecyjalistaŭ, piša DW.com.
Niamieckaja asacyjacyja ličbavaj industryi «Bitkom» prapanavała ŭradu Hiermanii vyrašyć kadravy hoład u hetaj halinie. Ciapier na rynku pracy nie chapaje kala 100 tysiač prahramistaŭ. Mienavita tamu admysłoŭcy prapanoŭvajuć uradoŭcam źnizić patrabavańni da viedańnia pracaŭnikami niamieckaj movy i paskoryć praceduru vydačy pracoŭnych vizaŭ.
«My prezientavali admysłovuju prahramu pad nazvaj #greencard22, jakaja, u pryvatnaści, prapanuje na praciahu adnaho tydnia vydavać dazvoł na žycharstva i dazvoł na pracu śpiecyjalistam, jakija ŭžo majuć kankretnuju prapanovu adnosna pracy», — kaža Adel Chołdampf-Viendel z kampanii «Bitkom».
Pakul pradstaŭniki rynku viaduć pieramovy z palitykami i spadziajucca na stanoŭčaje vyrašeńnie pytańniaŭ. Sami jany zychodziać z taho, što kala 170 tysiač IT-śpiecyjalistaŭ užo pakinuli Rasiju i što ich možna było b zacikavić pierśpiektyvami žyćcia i pracy ŭ Hiermaniju, ustupiŭšy ŭ kankurencyju za ich z ZŠA. Pra biełaruskich prahramistaŭ asobna nie havorycca.
Siarod inšaha kampanija Bitkom prapanuje, kab nie ŭźnikła pahrozaŭ biaśpiecy, pierakanacca, što suiskalniki na pracu ŭ Hiermanii nie padtrymlivajuć vajnu Rasii ŭ Ukrainie i padzialajuć najvažniejšyja pryncypy i kaštoŭnaści niamieckaj demakratyi. Praŭda, jakim čynam heta zrabić, jany nie viedajuć i tolki spadziajucca, što nadziejny sposab jość u dziaržaŭnych orhanaŭ.
Kamientary