— Andrej Michajłavič, jakija pryčyny charčovych atručeńniaŭ?
— Treba skazać, što atručeńni, abo charčovyja taksikainfiekcyi — heta vostryja infiekcyjnyja zachvorvańni, jakija vyklikajuć umoŭna-patahiennyja bakteryi. Pry traplańni mikraarhanizmaŭ u charčovyja pradukty ŭ ich nazapašvajucca taksiny, jakija mohuć vyklikać atručeńni čałavieka.
Charčovuju taksikainfiekcyju vyklikaje vialikaja hrupa bakteryj. Uzbudžalniki šyroka raspaŭsiudžanyja ŭ pryrodzie, vałodajuć jaŭnaj ustojlivaściu i zdolnyja razmnažacca ŭ navakolnym asiarodździ. Usie jany — pastajannyja pradstaŭniki narmalnaj mikrafłory kišečnika čałavieka i žyvioł.
— Što źjaŭlajecca krynicaj infiekcyi?
— Roznyja žyvioły i ludzi. Najbolš časta heta asoby, jakija majuć hnojnyja zachvorvańni — panarycyj (hnojnaje zapaleńnie tkanak palcaŭ), anhinu, furunkuloz i inšyja. Siarod žyvioł — karovy i aviečki, jakija chvarejuć na mastyty. Usie jany vydzialajuć uzbudžalnika (zvyčajna stafiłakoki), jakija traplajuć u charčovyja pradukty padčas ich apracoŭki, dzie i adbyvajecca razmnažeńnie i nazapašvańnie bakteryj. Epidemičnuju niebiaśpieku składajuć jak chvoryja, tak i nośbity ŭzbudžalnikaŭ. Praŭda, pieryjad zaraźlivaści chvorych nievialiki.
Uzbudžalnikaŭ niekatorych taksikainfiekcyj ludzi i žyvioły vydzialajuć u navakolnaje asiarodździe. Reziervuaram šeraha ŭzbudžalnikaŭ mohuć źjaŭlacca hleba, vada i inšyja abjekty navakolnaha asiarodździa, zabrudžanyja vydzialeńniami žyvioł i čałavieka.
— Jak uzbudžalniki traplajuć u ježu?
— Miechanizm pieradačy — fiekalna-aralny, asnoŭny šlach pieradačy — charčovy. Dla ŭźniknieńnia charčovych taksikainfiekcyj, vyklikanych umoŭna-patahiennymi bakteryjami, nieabchodnaja masiŭnaja doza ŭzbudžalnika abo peŭny čas dla jaho razmnažeńnia ŭ charčovych praduktach. Čaściej za ŭsio charčovyja taksikainfiekcyi źviazanyja z užyvańniem małaka, małočnych praduktaŭ, rybnych kansiervaŭ u alei, miasnych, rybnych i aharodninnych straŭ, a taksama kandytarskich vyrabaŭ, jakija źmiaščajuć krem — torty, pirožnyja. Pryhatavańnie niekatorych miasnych straŭ i vyrabaŭ, pavolnaje achałodžvańnie, šmatrazovaje padahravańnie, umovy ich realizacyi spryjajuć prarastańniu spor i razmnažeńniu viehietatyŭnych formaŭ. U pieradačy ŭzbudžalnika ŭdzielničajuć roznyja abjekty navakolnaha asiarodździa: vada, hleba, raśliny, pradmiety bytu i dohladu chvorych.
— A ci moža naš imunitet supraćstajać infiekcyi?
— Naturalnaja ŭsprymalnaść ludziej vysokaja. Zvyčajna ciarpić bolšaść asob, jakija ŭžyvali zaražanuju ježu. Adnak aprača ŭłaścivaściaŭ uzbudžalnika (dastatkovaja doza, vysokaja virulentnaść), dla raźvićcia zachvorvańnia patrabujecca šerah spryjalnych faktaraŭ jak z boku mikraarhanizma, tak i čałavieka — źnižanaja supraciŭlalnaść, najaŭnaść spadarožnych zachvorvańniaŭ. Najbolš usprymalnyja ludzi z hrupy ryzyki: novanarodžanyja, asłablenyja asoby, pacyjenty paśla chirurhičnych umiašańniaŭ abo doŭhaha pryjomu antybijotykaŭ.
Treba dadać, što zachvorvańni, vyklikanyja ŭmoŭna-patahiennymi mikraarhanizmami, raspaŭsiudžanyja paŭsiudna. Uspyški niaredka zdarajucca ŭ siemjach. Vielmi charakternyja hrupavyja zaražeńni siarod pasažyraŭ marskich sudnaŭ, turystaŭ i členaŭ dziciačych i darosłych arhanizavanych kalektyvaŭ. Uspyški zvyčajna nosiać vybuchovy charaktar i čaściej rehistrujucca letam.
— Kolki zvyčajna doŭžycca zachvorvańnie?
— Inkubacyjny (schavany) pieryjad składaje, jak praviła, niekalki hadzin, adnak u asobnych vypadkach jon moža skaračacca da 30 chvilin abo, naadvarot, padaŭžacca da 24 hadzin i bolš.
Dla zachvorvańniaŭ charakterny vostry pačatak — z młosnaści, nieadnarazovych vanitaŭ, vadkaha stułu ad niekalki da dziesiaci razoŭ na sutki i bolš. Boli ŭ žyvacie i tempieratura mohuć być niaznačnymi, adnak u častcy vypadkaŭ nazirajucca mocnyja schvatkapadobnyja boli ŭ žyvacie, karotkačasovaje (da sutak) pavyšeńnie tempieratury cieła da 38-39 hradusaŭ, dryžyki, ahulnaja słabaść, hałaŭny bol. Chod zachvorvańnia karotki i zvyčajna doŭžycca adzin-try dni.
U takich vypadkach pakazanaje pramyvańnie straŭnika, rańniaje pryznačeńnie enterasarbientaŭ (aktyvavany vuhal i inšaje), vitaminaŭ.
— Jak možna papiaredzić charčovyja atručeńni?
— U asnovie prafiłaktyki — zachavańnie sanitarna-hihijeničnaha i technałahičnaha režymaŭ, normaŭ i praviłaŭ narychtoŭki, pryhatavańnia, zachoŭvańnia i realizacyi charčovych praduktaŭ. Dla papiaredžańnia stafiłakokavych atručeńniaŭ u rabotnikaŭ charčovych pradpryjemstvaŭ pravodziać sanacyju nośbitaŭ stafiłakoka ŭ nasahłotcy i na skurnym pokryvie, lačeńnie chraničnych zapalenčych zachvorvańniaŭ mindalin i vierchnich dychalnych šlachoŭ.
Vialikaje značeńnie majuć kantrol za vykanańniem sanitarna-hihijeničnaha režymu na charčovych pradpryjemstvach i ŭ lačebna-prafiłaktyčnych ustanovach, vykanańnie praviłaŭ asabistaj hihijeny. Važna pravilna zachoŭvać charčovyja pradukty, vyklučyć razmnažeńnie ŭ ich uzbudžalnikaŭ charčovych taksikainfiekcyj. Nadzvyčaj važnyja termičnaja apracoŭka charčovych praduktaŭ, kipiačeńnie małaka i vykanańnie terminaŭ ich realizacyi.
šop mnie takoje złopać na abied?