Lidery arhkamiteta pa stvareńni partyi «Biełaruskaja chryścijanskaja demakratyja» abražanyja siužetam Pieršaha kanała pra dziejnaść arhanizacyi.
Sustaršynia arhkamiteta BCHD Pavał Sieviaryniec paviedamiŭ, što lidery arhkamiteta majuć namier padać u sud na Pieršy nacyjanalny kanał Biełaruskaha telebačańnia.
Pavodle jaho słovaŭ, 27 vieraśnia ŭ prahramie «Panarama» Pieršaha kanała vyjšaŭ siužet, jaki zakranaje honar i hodnaść arhanizataraŭ BCHD. Ranicaj 28 vieraśnia hety siužet byŭ paŭtorany. Jak śćviardžaje Sieviaryniec, sutnaść siužetu ŭ tym, što BCHD «źjaŭlajecca siektanckaj arhanizacyjaj, a pierakanańni čalcoŭ arhkamiteta dalokija ad chryścijanskich kaštoŭnaściaŭ».
«My ličym, što sproba dyskredytavać BCHD mienavita zaraz nievypadkovaja: my rychtujemsia da praviadzieńnia čarhovaha ŭstanoŭčaha źjezdu. Jašče bolš nas aburaje toje, što hety siužet byŭ pakazany ŭ adnoj źviazcy ź vizitam u Biełaruś patryjarcha Maskoŭskaha i ŭsiaje Rusi Kiryła», — paviedamiŭ Sieviaryniec.
Pry hetym jon adznačyŭ, što za apošni čas kolkaść ankietavanych ludziej, hatovych dałučycca da BCHD, vyrasła ŭ čatyry razy. BCHD praviała šerah paśpiachovych kampanijaŭ, adnoj ź jakich stała kampanija suprać akultyzmu ŭ ŚMI, jakaja atrymała padtrymku na ŭzroŭni zakanadaŭčych aktaŭ. «Adsiul hetaja nianaviść pa BT», — ličyć Sieviaryniec.
«U Biełarusi narmalnyja ludzi viedajuć: pasłuchaj BT i zrabi naadvarot. Kali kažuć, što rubiel stabilny — čakaj devalvacyi. Ačarniajuć BCHD — značyć, čas ŭstupać u šerahi chryścijanskich demakrataŭ», — zajaviŭ Sieviaryniec.
Miarkujecca, što pazoŭ u sud budzie padadzieny ŭ sieradu, 30 vieraśnia, paviedamiŭ palityk.
