Dzieviać mabilnych prahram, jakija pavialičać kolkaść biełaruskamoŭnaha kantentu ŭ vašym žyćci

Knižny Voz

Biascenny dadatak dla tych, chto žadaje zaŭsiody mieć mahčymaść słuchać knihi pa-biełarusku. Śpis knih tut dosyć aryhinalny: ad bolš-mienš kłasičnych «Pryhod Rabinzona Kruza» i «Maŭhli» da tvoraŭ sučasnaj dziciačaj piśmieńnicy Nadziei Jaśminskaj, «Chronikaŭ Narnii» i vieršaŭ Andreja Skurko. Kantent u dadatku zbolšaha dziciačy.

Android Market / App Store

Skarnik — biełorusskij słovaŕ

Adzin z najlepšych biełaruskich anłajn-słoŭnikaŭ moža stać da vas jašče bližej. I ruska-biełaruskaja, i biełaruska-ruskaja viersii «Skarnika» majuć bolš za 100 tysiač słoŭ, taksama na resursie dastupny niebłahi tłumačalny słoŭnik. Vydańnie ŭvieś čas abnaŭlajecca, tamu nie bojciesia atrymać ad jaho sastarełyja viersii leksiki.

Android Market / App Store

Lemantar — biełaruski ałfavit

Prostaja i zrazumiełaja dziciačaja hulnia, jakaja dapamoža maleńkim biełarusam vyvučyć rodnyja litary. Dziciaci prapanujuć jarkija kartki z malunkami, pa jakich možna vyvučać słovy i litary, i aŭdyjaviersii litar, a taksama hulni, u jakich možna pravieryć svaje viedy. Usio nahladna i pryhoža — toje, što treba, kab pryciahnuć uvahu dziciaci.

Android Market / App Store

Mova prafiesii

Nazva hetaha dadatku moža hučać zanadta śpiecyjalizavana dla zvyčajnaha karystalnika, ale ž nasamreč heta cudoŭny sposab troški pašyryć svoj słoŭnikavy zapas. Naprykład, kali vy fanat ranišniaj kavy, prajdzicie modul pra kamunikacyju ŭ kaviarniach, chočacie padciahnuć viedy pa biełaruskich nazvach praduktaŭ — vam šlach u raździeł «Kramy». I nie prachodźcie mima častki «Asnovy»: jana dapamoža vam palepšyć fanietyku, padvučyć admietnyja biełaruskija słovy i šmat inšaha.

Android Market / App Store

Kryžavanki

Kłasičnaja kryžavanka, tolki na biełaruskaj movie. Jość roznyja viersii składanaści, kryžavanki, dzie treba pierakładać z ruskaj movy, roznyja padkazki, mahčymaść hulać afłajn i navat načnaja tema dla hulni ŭviečary. Ale budźcie aściarožnyja: hetaja hulnia nasamreč zaciahvaje.

Android Market / App Store

Šlach

Jašče adna hulnia, što padciahnie vaš uzrovień biełaruskaj movy. Zadańnie prostaje — złučać litary ŭ słovy. Stvaralniki abiacajuć, što hulnia nie dazvolić zasumavać navat samym kiemlivym, bo z kožnym uzroŭniem słovy ŭskładniajucca. Dobra, što ŭ hulniu ŭbudavany słoŭnik, jaki dazvalaje prahladzieć i pierakład słova, i jaho tłumačeńnie.

App Store

Kazki

Adzin z najlepšych biełaruskamoŭnych prajektaŭ u śviecie mabilnych dadatkaŭ: biblijateka z 53 kazak, prafiesijna ahučanych Aleham Chamienkam i hurtom «Pałac». Razam z kazkami vy atrymajecie bolš za 15 ilustracyj z hierojami biełaruskaha falkłoru i mahčymaść razmalavać kožnuju ź ich.

Android Market / App Store

Viedaj movu!

Dadatak, što daje mahčymaść papoŭnić viedy pa biełaruskaj movie i patreniravać pamiać. U adroźnieńnie ad minułych prahram, «Viedaj movu!» nadaje bolš uvahi hramatycy, čym leksicy, i hetym jon cikavy.

Android Market

Biełaruskaje Radyjo Racyja

Viadoma, tut jość naviny, niezdarma ž heta dadatak miedyja. Ale nie abydzicie ŭvahaj i padkasty, pradstaŭlenyja «Radyjo Racyja». Tut vy znojdziecie vypuski pra historyju, kulturu i adukacyju, hramadstva i ekanomiku, a taksama zabaŭlalnyja pieradačy — śpisu chopić nadoŭha.

Android Market / App Store

10 piesień pa-biełarusku, jakija možna słuchać i śpiavać ź dziciom

6 biełaruskamoŭnych jutub-kanałaŭ, jakija vy mahli prapuścić

Chočacie na rodnaj movie? Voś piać resursaŭ, dzie možna pahladzieć kino pa-biełarusku

• 57
• 0
• 2
• 0
• 0
• 0
• 5
• 0