«Baćkaŭščyna» znajšła pa-za miežami Biełarusi skarb

Mižnarodnaje hramadskaje abjadnańnie «Zhurtavańnie biełarusaŭ śvietu «Baćkaŭščyna» źviarnułasia da pałaty pradstaŭnikoŭ z zaklikam uznavić pracu pa raspracoŭcy prajekta zakona, jaki b rehulavaŭ stasunki Respubliki Biełaruś ź biełarusami zamiežža.

Taksama ŭ liście rekamiendujecca pry raspracoŭcy zakonaprajekta pryniać za asnovu prapanovy i zaŭvahi MHA «ZBS «Baćkaŭščyna», u tym liku prajekt zakona «Ab biełarusach zamiežža», pryniatyja na Piatym źjeździe biełarusaŭ śvietu.

Pytańnie jurydyčnaha ŭrehulavańnia stasunkaŭ biełaruskaj dziaržavy ź biełarusami zamiežža «Baćkaŭščyna» nie ŭpieršyniu pa daručeńni supołak biełaruskaj dyjaspary ŭzdymaje pierad dziaržaŭnymi orhanami.

U 2001 hodzie Nacyjanalny centr zakonaprajektnaj dziejnaści pry prezidencie Respubliki Biełaruś pa daručeńni kiraŭnika dziaržavy pačaŭ raspracoŭku prajekta Zakona Respubliki Biełaruś «Ab suajčyńnikach, jakija pražyvajuć za miažoj».

U tym ža hodzie MHA «ZBS «Baćkaŭščyna» brała ŭdzieł u pracy Rabočaj hrupy pry zhadanym Nacyjanalnym centry i vyjšła z šeraham pryncypovych zaŭvah i prapanovaŭ, jakija hruntavalisia na pažadańniach biełaruskich supołak zamiežža. Ale Centr zakonaprajektnaj dziejnaści spyniŭ pracu nad prajektam zakona, i jaho razhlad, zapłanavany na vosień 2002 hoda, nie adbyŭsia. Z prośbaj paskoryć pryniaćcie zakona źviartalisia da uradu i nacyjanalnaha schodu ŭdzielniki Čaćviortaha i Piataha źjezdaŭ biełarusaŭ śvietu (2005, 2009 h.), ale taksama biezvynikova.

Takim čynam, na siońniašni dzień zhadany zakon tak i nie pryniaty. U toj ža čas, biełaruskaja dyjaspara — heta vielizarny nacyjanalny resurs, jaki moža stać važnym faktaram ekanamičnaha i duchoŭnaha ŭzdymu Biełarusi, spryjać rostu mižnarodnaha aŭtarytetu i pavyšeńniu prestyžu našaj krainy ŭ śviecie. I kab heta adbyłosia, nielha pracavać kropkava, vybaračna. Nieabchodna metaskiravanaja paśladoŭnaja praca.

Jak adznačyła staršynia Rady MHA «ZBS «Baćkaŭščyna» Nina Šydłoŭskaja: «Zhadany vyšej zvarot, nakiravany «Baćkaŭščynaj» u pałatu pradstaŭnikoŭ, jość jašče adnoj sprobaj źviarnuć uvahu dziaržavy na najbahaciejšy patencyjał biełaruskaj dyjaspary, nievykarystańnie jakoha prynosić vialikija straty dziaržaŭnym intaresam Respubliki Biełaruś i ŭsioj biełaruskaj nacyi. Ci budzie hetaja sproba paśpiachovaj? Čas pakaža. Z svajho boku «Baćkaŭščyna» hatova naładzić šyrokaje abmierkavańnie prajekta zakona (ci jaho kancepcyi) u supołkach biełarusaŭ zamiežža, a taksama vyłučyć svaich pradstaŭnikoŭ u skład rabočaj hrupy ci kamisii pa raspracoŭcy prajekta zakona ab biełarusach zamiežža».

• 0
• 0
• 0
• 0
• 0
• 0
• 0
• 0