Adziny mytny kodeks Biełarusi, Kazachstana i Rasii płanujecca padpisać 27 listapada ŭ Minsku.
Pra heta paviedamiŭ staršynia Dziaržaŭnaha mytnaha kamiteta Biełarusi Alaksandr Špileŭski 9 kastryčnika paśla zakančeńnia pasiadžeńnia savieta kiraŭnikoŭ mytnych słužbaŭ dziaržaŭ SND u Kazani.
«My jak nikoli raniej padyšli da stvareńnia mytnaha sajuza. 27 listapada hetaha hoda ŭ Minsku płanujecca padpisańnie klučavoha dakumienta mytnaha sajuza — mytnaha kodeksa», — cytuje Špileŭskaha RIA Novosti.
Jak patłumačyŭ staršynia Kamiteta mytnaha kantrolu Ministerstva finansaŭ KazachstanaKazy‑Karpieš Karbuzaŭ, ciapier krainy mytnaha sajuza viaduć rabotu pa unifikacyi zakanadaŭčaj bazy, jakaja dazvolić istotna spraścić mytnyja pracedury. Taryfnaja palityka unifikavana ŭžo na 98%, viadziecca unifikacyja ŭ inšych kirunkach. Krainy pastavili zadaču zaviaršyć hetuju rabotu da 1 studzienia 2010 hoda, skazaŭ Karbuzaŭ.
Jon taksama paviedamiŭ, što z 1 lipienia 2010 hoda ŭvojdzie ŭ dziejańnie mytny kodeks sajuza, a z 1 lipienia 2011 hoda płanujecca adkryć unutranyja miežy pamiž Rasijaj i Kazachstanam. «Jość kankretny płan, jość uzajemadziejańnie pa ŭsich kirunkach. My zacikaŭleny, heta sapraŭdy sajuz, dzie budzie svabodnaje pieramiaščeńnie tavaraŭ, heta rynak, heta vialiki davier adna da adnoj našych dziaržaŭ», — zajaviŭ Karbuzaŭ.
Kiraŭnik Fiederalnaj mytnaj słužby RF Andrej Bieljaninaŭ adznačyŭ, što stvareńnie mytnaha sajuza dyktuje nieabchodnaść intehracyi, spraščeńnia mytnych pracedur. «My vyjšli na ŭzrovień abmierkavańnia spraščeńnia mytnych pracedur, na ŭzrovień vysokaha technałahičnaha infarmacyjnaha ŭzajemadziejańnia. My zanadta doŭha pracavali ŭ roznych farmatach, i ciapier vielmi zakłapočanyja tym, jak budziem pracavać u halinie pieradavych infarmacyjnych technałohij. Dla nas ciapier heta adna z samych nadzionnych i pryjarytetnych zadač — jak my navučymsia razumieć adzin adnaho ŭ elektronnym vyhladzie, nakolki buduć sproščany mytnyja pracedury», — adznačyŭ rasijski čynoŭnik.
Bieljaninaŭ paviedamiŭ, što na pasiadžeńni ŭ Kazani mytnyja viedamstvy krain SND abmierkavali 15 roznych tem, ni pa adnoj ź ich nie ŭźnikła roznahałośsiaŭ.
U pracy savieta ŭziali ŭdzieł kiraŭniki mytnych słužbaŭ Azierbajdžana, Armienii, Biełarusi, Kazachstana, Kyrhyzstana, Małdovy, Rasii, Tadžykistana, Uźbiekistana, Ukrainy.
