U pieršaj pałovie listapada Łukašenka naviedaje Ukrainu. Pra heta na bryfinhu ŭ Minsku paviedamiŭ ministr zamiežnych spravaŭ Ukrainy Piotr Parašenka.
Apošni vizit Łukašenki va Ŭkrainu prachodziŭ u studzieni sioleta. Tady kiraŭniki krain sustrakalisia ŭ pamiežnym Čarnihavie.
Biełaruski kaleha Parašenki Siarhiej Martynaŭ dadaŭ, što ciaham pieramovaŭ 19 kastryčnika abmiarkoŭvalisia pytańni biełaruska‑ŭkrainskich stasunkaŭ i uzajemnaj padtrymki ŭ ramkach prahramy «Ŭschodniaje partniorstva» i z krainami Jeŭrasajuzu ŭ cełym.
«U kožnaj krainy jość svaje intaresy, ale pamiž Biełaruśsiu i Ukrainaj isnuje mnostva ahulnych intaresaŭ», — zajaviŭ S.Martynaŭ.
Biełaruski ministr paviedamiŭ, što na pieramovach abmiarkoŭvalisia paručeńni, jakija dali prezidenty abodvuch krain paśla sustrečy na samicie SND u Kišyniovie. Nahadajem, što tam i Juščanka, i Łukašenka krytykavali Rasiju.
Što datyčyć pytańnia ratyfikacyi damovy ab dziaržaŭnaj miažy, to Piotr Parašenka skazaŭ: «Ja dumaju, što baki hatovyja zrabić sustrečnyja kroki ŭ hetym pytańni. Ciapier va Ukrainie pačałasia vybarčaja kampanija, a heta nie lepšy čas dla padpisańnia važnych dakumientaŭ. Upeŭnieny, što nami budzie pradstaŭleny prahres», — skazaŭ P.Parašenka.
