«Siońnia, jak nikoli, źjaŭlajecca aktualnym pytańnie ab praviadzieńni adkrytaha i publičnaha pracesu pa ich spravie. Takoha pracesu my budziem patrabavać ad uład.Tolki adkryty praces moža prademanstravać, što hetyja ludzi nievinavatyja, albo heta šans dla ŭład pakazać, što abvinavačańni ŭ dačynieńni da ich majuć pad saboj jakija‑niebudź padstavy», — zajaviŭ 21 kastryčnika ŭ Minsku na prezientacyi knihi «Palitviaźni. Kryminalnyja prysudy, vyniesienyja ŭ 2008 hodzie pa palityčnych matyvach» pravaabaronca Valancin Stefanovič.
Pavodle jaho słoŭ, pravaabaroncam chopić vopytu i adukacyi, kab zrabić adpaviednyja vyvady ŭ dačynieńni da hetaj spravy. «
U advarotnym vypadku, kali praces projdzie za začynienymi dźviaryma, my budziem ličyć, što heta byŭ nie sud, a sudzilišča. Što sapraŭdy ŭłady ŭtojvajuć ad nas i ad hramadstva akaličnaści hetaj spravy», — adznačyŭ Stefanovič.
U svaju čarhu pravaabaronca Aleh Vołčak zajaviŭ na prezientacyi ab tym, što šansaŭ na adkryty praces pa spravie Aŭtuchoviča i Asipienki vielmi mała. «Rasśledavańnie spravy prachodzić u zakrytym režymie: usie advakaty dali padpisku ab nieraskryćci materyjałaŭ spravy. Pa svaim vopycie ja viedaju, što kali prachodzić zakrytaje rasśledavańnie, to i sud budzie zakrytym. Uspomnicie, naprykład, spravu byłoha prakurora Minskaj vobłaści Michaiła Śniehira. Śledstva prachodziła ŭ zakrytym režymie — i praces prachodzić u zakrytym režymie», — padkreśliŭ Vołčak.
Jon nahadaŭ, što ŭ dačynieńni da čatyroch čałaviek, jakija taksama prachodzili pa «spravie Aŭtuchoviča» ŭ jakaści padazronych, kryminalnaja vytvorčaść była spyniena. «Makuć, Navumovič, Paremskaja i Ułanaŭ atrymali na ruki adpaviednyja papiery», — skazaŭ Vołčak.
Nahadajem, 8 lutaha 2009 hoda ŭ Vaŭkavysku (Hrodzienskaja vobłaść) byli zatrymany pradprymalniki Mikałaj Aŭtuchovič, Juryj Lavonaŭ i Uładzimir Asipienka. 18 lutaha im było pradjaŭlena abvinavačvańnie pa art. 218 Kryminalnaha kodeksa (naŭmysnaje źniščeńnie albo paškodžańnie majomaści). 23 červienia ŭ dačynieńni da Aŭtuchoviča i, jak paviedamiła MUS, «inšych asob» była raspačata sprava pa art. 359 KK (terarystyčny akt) u vyhladzie padrychtoŭki (art. 13).
Lavonava vyzvalili ź minskaha śledčaha izalatara 8 žniŭnia. 24 vieraśnia ź jaho byli źniatyja ŭsie abvinavačańni. Aŭtuchovič i Asipienka znachodziacca ŭ śledčym izalatary № 1 Minska.
