Da ŭdziełu ŭ konkursie prymajucca narysy, ese, zamaloŭki, dakumientalnyja apoviedy i inšyja žurnalisckija materyjały mastacka‑publicystyčnaha žanru, jakija raskryvajuć unikalnaść i niepaŭtornaść čałaviečaj asoby, jaje rolu ŭ historyi, kultury, žyćci hramadstva.
Uziać udzieł u konkursie mohuć žurnalisty, jakija stała pracujuć u drukavanych, elektronnych ŚMI ci ŭ Internecie, a taksama fryłansiery.
Žurnalisckija pracy (nie bolš za 1 materyjał ad adnaho aŭtara) prymajucca na konkurs u drukavanym i elektronnym vyhladzie. Supracoŭnikam radyjo treba pradstavić teksty i zapisy svaich prahram na CD. Žurnalistam, jakija pracujuć na telebačańni, treba pradstavić na konkurs scenary, a taksama siužety na CD.
Pracy pavinny supravadžacca listom z kantaktnymi dadzienymi asoby, a taksama karotkim raspoviedam pra tvorčy šlach žurnalista.
Na konkurs prymajucca žurnalisckija materyjały, apublikavanyja z 1 studzienia 2009 hoda pa 15 śniežnia 2009 hoda ŭklučna. Dasłać tvorčyja pracy nieabchodna da 20 śniežnia 2009 hoda (pa paštovym štampie) na adras: h. Minsk, pł. Svabody, 17—304 z paznakaj «Na konkurs imia Vieraniki Čarkasavaj» i na elektronnuju skryniu [email protected].
Abviaščeńnie vynikaŭ konkursu adbudziecca na dzień naradžeńnia Vieraniki Čarkasavaj — 12 studzienia 2010 hoda.
Hałoŭnym kryteram acenki tvoraŭ budzie ŭsiebakovaje raskryćcio asoby hieroja žurnalisckaha materyjału, jaho ŭnutranaha śvietu i ŭpłyvu na źniešni asiarodak, jaho niepaŭtornaści ŭ hetym śviecie.
Pa vynikach tvorčaha spabornictva buduć vyznačanyja try pieramožcy, jakija atrymajuć mahčymaść prajści prafiesijnuju stažyroŭku ŭ adnoj z krain Jeŭraźviazu i pamiatnyja dypłomy.
Daviedka:
Vieranika Čarkasava — viadomaja biełaruskaja žurnalistka, jakuju znajšli zabitaj va ŭłasnaj kvatery 20 kastryčnika 2004 hoda va ŭzroście 45 hadoŭ. Dahetul nieviadoma, chto zamoviŭ i vykanaŭ hetaje złačynstva. Śledstva pa spravie prypyniena z 2007 hoda «ŭ suviazi ź nievyśvietlenaściu asoby, jakaja padlahaje pryciahnieńniu ŭ jakaści abvinavačanaha».
Śledčyja vyznačyli ŭ jakaści asnoŭnaj bytavuju viersiju zabojstva. Adnak, praviedzienyja kalehami Vieraniki žurnalisckija rasśledavańni dajuć padstavy mierkavać, što zabojstva V. Čarkasavaj ździejśniŭ prafiesijny kiler, jaki insceniravaŭ zabojstva na bytavoj hlebie. (Čytać artykuły Siarhieja Sacuka «Strach kak dostatočnoje osnovanije, ili Kto raspraviłsia s Vieronikoj Čierkasovoj?» i «Ciena žiźni»).
Vieranika Čarkasava naradziłasia 12 studzienia 1959 hoda ŭ Minsku. Skončyła žurfak BDU, paśla čaho pracavała ŭ moładzievaj redakcyi biełaruskaha telebačańnia. Zatym — u hazietach «Hołas Radzimy», «Imia», «BDH», «Svaboda», «Biełorusskaja hazieta». Apošnija hady žyćcia — u «Salidarnaści».
Hierojami jaje šmatlikich artykułaŭ byli Ludzi — ich śvietłyja i ciomnyja baki, ich pieramohi i parazy, hłupstvy i hodnyja ŭčynki. Dla jaje nie było niecikavych asobaŭ, nie vartych uvahi dumak ci słovaŭ. Jaje tvorčaść vyznačałasia čałaviečnaściu, jakuju tak ciažka zachavać u siońniašnim cyničnym śviecie.
Mastacka‑publicystyčny žanr, u jakim vydatna pracavała Vieranika Čarkasava, siońnia znachodziacca ŭ zaniapadzie. U pahoni za siensacyjami, navinami‑adnadzionkami žurnalistyka ŭsie mienš cikavicca žyvymi asobami, jakija i jość sapraŭdnymi hierojami luboha času.
