Uładzimir Poźnier adčuŭ soram za žurnalistaŭ, ale naŭrad ci za rasijskich
Dniami znakamity jašče z dalokich savieckich časoŭ rasijski žurnalist 88-hadovy Uładzimir Poźnier upieršyniu z pačatku raźviazanaj Rasijaj poŭnamaštabnaj vajny z Ukrainaj publična vykazaŭsia pra biahučyja padziei, udzielničajučy ŭ jutub-tranślacyi, arhanizavanaj arhanizacyjaj Code Pink. Tam jon raskrytykavaŭ aśviatleńnie vajny ŭ ŚMI i skazaŭ, što «kali jość piekła, žurnalisty tudy trapiać». Niekatoryja padumali, što heta jon pra rasijskich prapahandystaŭ. Ale, jak piša rasijskaja słužba «Radyjo Svaboda», ahulny kantekst schilaje da taho, kab dumać inakš.
«Mnie soramna za maju prafiesiju, mnie soramna za toje, što robiać, za chłuśniu, jakaja pradstaŭlajecca jak praŭda, za prapahandu ŭ najhoršym sensie hetaha słova. Ja nie pavinien hetaha kazać, ale ja skažu. Ja ateist, ale kali jość piekła, to žurnalisty tudy trapiać», — tak skazaŭ Poźnier.
Adnak «Radyjo Svaboda» adznačaje, što strym, u jakim pryniaŭ udzieł Poźnier, byŭ admysłova pryśviečany vajnie va Ukrainie i nasiŭ jaŭna praŭładny charaktar. U jaho apisańni havorycca, što «vajna va Ukrainie pačałasia ŭ 2014 hodzie, kali Złučanyja Štaty arhanizavali pieravarot va Ukrainie, kab zrynuć režym, pry jakim Ukraina była niejtralnaj krainaj, i zamianić jaje na antyrasijski i praamierykanski režym, jaki nieadkładna pačaŭ vajnu suprać Danbasa». Heta akurat toje samaje, što niastomna tranślujuć pucinskija prapahandysty. Dy i sama arhanizacyja Code Pink pazicyjanuje siabie jak «fieminisckaja arhanizacyja, jakaja imkniecca da taho, kab pakončyć z vojnami i impieryjalizmam ZŠA».
Poźnier na hetym strymie kala hadziny čytaŭ histaryčnuju lekcyju ab pryčynach, jakija, na jaho dumku, pryviali da vajny va Ukrainie, i choć nie admaŭlaŭ adkaznaści Pucina za ŭvarvańnie, adnak sprabavaŭ rastłumačyć łohiku dziejańniaŭ rasijskaha prezidenta.
U svaim vystupie Poźnier, choć i z ahavorkami, pa mnohich punktach faktyčna abo padtrymlivaŭ tezisy Kramla, ci prynamsi vystupaŭ ź ich razumieńniem.
Naprykład, jon śćviardžaŭ, što Zachad davaŭ abiacańnie nie pašyrać NATA (choć i niefarmalnaje) i nie strymaŭ jaho, a taksama śćviardžaje, što ZŠA «pstrykali miadźviedzia pa nosie», pravakujučy Rasiju.
Taksama Poźnier zadajecca pytańniem, jak by adreahavali ZŠA, kali b u Mieksicy da ŭłady pryjšoŭ antyamierykanski prezident i paklikaŭ na dapamohu rasijskaje vojska — lustranaja situacyja, na jaho dumku, adbyłasia va Ukrainie. Ukrainskaha prezidenta Uładzimira Zialenskaha jon ličyć całkam zaležnym ad ZŠA.
Pry hetym Poźnier nie kaža, što padtrymlivaje vajnu, a tolki zaklikaje «analizavać fakty» i zrazumieć łohiku Kramla.
U hetym kantekście jaho acenka žurnalistaŭ usprymajecca pierš za ŭsio jak krytyka zachodnich ŚMI, jakija aśviatlajuć kanflikt z praŭkrainskich pazicyj. Pa słovach Poźniera, pradstaŭniki zachodnich libieralnych elit zusim nie razumiejuć, što adbyvajecca ŭ Rasii i Ukrainie.
Pa słovach Poźniera, bolšaść z tych, z kim jon maje znosiny ŭ Rasii, vystupajuć suprać vajny, ale 80% nasielnictva krainy padtrymlivaje Pucina.
Jak skłaŭsia los chłopca ź viadomaha žyćcieśćviardžalnaha fota studenckaha maršu-2020?4
Kamientary