Śledčy kamitet uspomniŭ pra «napad na biełaruskaje pasolstva ŭ Vialikabrytanii» paŭtarahadovaj daŭniny
Śledčy kamitet paviedamiŭ, što raspačaŭ praces «śpiecyjalnaj vytvorčaści» pa spravie «napad na supracoŭnikaŭ dypmisii kala budynka pasolstva Respubliki Biełaruś u Złučanym Karaleŭstvie Vialikabrytanii i Paŭnočnaj Irłandyi» u śniežni 2021 hoda.
Praces raspačaty ŭ dačynieńni da čatyroch čałaviek: Vadzima Bahaŭkova, Maksima Zujeva, Siarhieja Rabuški i Alaksandra Naprejenki.
U dačynieńni da Bahaŭkova i Zujeva vytvorčaść viadziecca pavodle artykułaŭ ab raspalvańni varožaści (č. 3 art. 130 KK), naŭmysnym paškodžańni čužoj majomaści ( č. 3 art. 218 KK), hvałcie i pahrozie hvałtu ŭ dačynieńni da słužbovaj asoby (č. 1 art. 366 KK). U dačynieńni da Naprejenki i Rabuški — pavodle artykułaŭ ab raspalvańni varožaści (č. 3 art. 130 KK) i naŭmysnym paškodžańni čužoj majomaści (č. 3 art. 218 KK).
MZS Biełarusi zajaviła pra napad na svajo pasolstva i źbićcio konsuła ŭ Łondanie 20 śniežnia 2021 hoda. Pavodle ich, heta adbyłosia viečaram 19 śniežnia.
«Adnamu z supracoŭnikaŭ pasolstva byli naniesienyja surjoznyja cialesnyja paškodžańni, spatrebiłasia terminovaja miedycynskaja dapamoha. Va ŭstanovie achovy zdaroŭja dyjahnastavany pierałom nosa, strasieńnie mozha lohkaj stupieni i traŭmatyčny pierałom zuba», — zaznačałasia ŭ zajavie MZS.
U napadzie MZS Biełarusi abvinavaciła «radykalnuju emihranckuju hrupoŭku «Nadzieja». Havorka viadziecca pra supolnaść biełarusaŭ u Vialikabrytanii, jakaja vystupaje za spynieńnie represij i novyja vybary ŭ Biełarusi. U joj naličvajecca 600 čałaviek. Sama «Nadzieja» svaju datyčnaść da lubych hvałtoŭnych dziejańniaŭ admaŭlała.
Kamientary