U minskaj škole imia praŭładnaha piśmieńnika Čarhinca adkryli muziej, pryśviečany Čarhincu. Pry jahonym žyćci
U siaredniaj škole №76 Minska adkryŭsia muziej, pryśviečany narodnamu piśmieńniku, hanarovamu staršyni praŭładnaha Sajuza piśmieńnikaŭ Biełarusi, hienierału-lejtenantu Mikałaju Čarhincu. Čym viadomy Čarhiniec, zhadvaje «Radyjo Svaboda».
Jak apisvaje padzieju dziaržaŭnaja presa, Čarhinca sustrakali «hromam apładysmientaŭ i vajennym arkiestram».
U ekspazicyi muzieja, jak vynikaje z fotaspravazdačy dziaržaŭnych ŚMI, pradstaŭlenyja jaho knihi, miedali, dypłomy, adzieńnie, frahmienty zbroi.
U śniežni 2022 hoda zhadanuju minskuju škołu ŭžo nazvali imiem Čarhinca, choć zvyčajna škoły nazyvajuć imionami ludziej užo paśla ich śmierci.
84-hadovy Čarhiniec piša na ruskaj movie. Atrymaŭ viadomaść jak aŭtar milicejskich detektyvaŭ «Śledstvije prodołžajetsia», «Finał Kraba», «Słužba — dni i noči», «Vam — zadanije», «Za siekundu do vystrieła».
Samym skandalnym tvoram Čarhinca źjaŭlajecca raman «Tajna Ovalnoho kabinieta», u jakim z šeraham intymnych scenaŭ piśmieńnik apisaŭ kiravańnie prezidenta ZŠA Biła Klintana.
Z prychodam da ŭłady Alaksandra Łukašenki Čarhiniec padtrymaŭ jaho. Bolš za dziesiać hadoŭ jon uznačalvaŭ kamisiju mižnarodnych spraŭ u Saviecie Respubliki (1996—2008), u 2001-m byŭ davieranaj asobaj Łukašenki na prezidenckich vybarach.
Čarhiniec źjaŭlaŭsia pieršym kiraŭnikom Sajuza piśmieńnikaŭ Biełarusi (SPB), stvoranaha ŭ 2006-m, kali častka litarataraŭ, jakaja znachodziłasia na pradziaržaŭnych pazicyjach, vyjšła z adzinaha Sajuza biełaruskich piśmieńnikaŭ (SBP), jaki isnavaŭ jašče ź siaredziny 1930-ch hadoŭ. SPB atrymaŭ dziaržaŭnuju padtrymku, pamiaškańni ŭ budynku Doma litarataraŭ u centry Minska, a taksama kantrol nad dziaržaŭnymi litaraturnymi vydańniami. Što tyčycca «niedziaržaŭnaha» SBP, to ŭ 2021 hodzie Viarchoŭny sud jaho likvidavaŭ.
U čas, kali Sajuzam piśmieńnikaŭ kiravaŭ Čarhiniec, nakład kaliści papularnaha štotydniovika «Litaratura i mastactva» źmienšyŭsia amal u dziesiać razoŭ. Ź viedama Čarhinca imiony šerahu viadomych piśmieńnikaŭ byli ŭniesienyja ŭ tak zvanyja «čornyja śpisy» dziaržaŭnych vydaviectvaŭ.
U 2022-m Čarhiniec staŭ hanarovym staršyniom SPB, Łukašenka daŭ jamu zvańnie narodnaha piśmieńnika Biełarusi, pastaviŭšy ŭ adzin šerah ź Jakubam Kołasam, Jankam Kupałam, Maksimam Tankam, Ryhoram Baradulinym i šeraham inšych słavutych aŭtaraŭ. Upieršyniu zvańnie atrymaŭ toj, chto piša pa-rusku.
Što čakaje Biełaruś u bližejšyja piać hadoŭ? A Rasiju i Jeŭropu? Śpiecdakładčyk AAN pa Biełarusi daje svoj raskład3
Kamientary