Vy budziecie śmiajacca, ale novy-stary premjer, jaki staŭ papularnym dziakujučy svajoj prarasiejskaj pazycyi, padobna, namierany vykonvać Universał nacyjanalnaha adzinstva. A hety dakumant praduhledžvaje siabravać i lubić usich dalokich i blizkich partneraŭ adnačasova. Inšymi słovami, być karysnym i patrebnym Kramlu i Vašynhtonu ŭvadnačas.
Eksperty adznačyli praciahłaść hutarki «śviežaha» kiraŭnika kabinetu ministraŭ z amerykanskim pasłom va Ŭkrainie. Viktar Fiodaravič klaŭsia na hetych sustrečach u viernaści demakratyčnym kaštoŭnaściam, a ludziej z masoŭki, jakija zładzili hetym letam antynataŭskuju histeryku ŭ Krymie, abazvaŭ «marhinałami». Ale ŭ Vialikaj hulni, jakuju viadzie zaraz Viktar Fiodaravič, kryŭdy krymčanaŭ mała što značać. Asnoŭny kaściak jahonych vybarščykaŭ znachodzicca ŭ centralnaj častcy Ŭkrainy. Voś dla ich Janukovič i vyrašyŭ pierš-napierš źlotać u Maskvu.
Ale naŭrad ci ŭ «biełakamiennaj» premjeru budzie prosta i kamfortna vieści pieramovy. Tak, Maskva nia lubić prezydenta Juščanku i navat nie sprabuje hetaha chavać. Z adnaho boku, viartańnie Janukoviča na vysoki post – heta, pa sutnaści, pieramoha Kramla. Ź inšaha, lider Partyi rehijonaŭ «padpisaŭsia» vykonvać źniešniepalityčny kurs prezydenta z akcentam na eŭraintehracyju. Inšymi słovami, faktyčna staŭ paplečnikam Juščanki. Jak ź im być, jak da jaho stavicca?
Jak stała viadoma ź nieaficyjnych krynicaŭ MZS'aŭskaha pachodžańnia, rasiejskaje kiraŭnictva vyrašyła spačatku pramacać Janukoviča i dapuścić jaho tolki da kiraŭnika ŭradu RF Michaiła Fradkova. U ciapierašnim pratakole vizytu ŭkrainskaha premjera sustreča z U.Pucinym nie zaplanavanaja.
Kiraŭnik sacyjalahičnaj słužby «Ŭkrainski barometar» Viktar Nabaženka pierakanany, što pieršaja pajezdka novaha-staroha premjera ŭ Maskvu – čysta palityčnaja i źviazanaja z zapuskam schiemy šmatvektarnaści, jakuju Janukovič padpisaŭsia ŭrečaiśnivać.
—Kali chtoś ličyć, što hałoŭnaje ŭ pajezdcy Janukoviča – źniaćcio napružanaści pa cenach na haz i benzyn, to jon pamylajecca. Mienšym košt hazu ŭsio roŭna nia stanie. Na niadaŭnim samicie vialikaj «vosiemki» ŭ Pieciarburhu było vyrazna damoŭlena – tolki kamercyjny košt. I Biełaruś užo adčuła na sabie takoje rašeńnie viadučych krainaŭ śvietu, jakoje pryniałasia vykonvać Rasieja.
