Na Kastryčnickaj płoščy Minska a 18-j pačałasia akcyja salidarnaści z paliviaźniami i pamiaci źnikłych biełaruskich viadomych dziejačoŭ.
18:29
Akcyja skončana, usie razychodziacca.
Cikava, što z advarotnaha boku praśpiekta, tam dzie Dom aficeraŭ, ciaham usioj akcyi znachodziłasia hrupa niepaŭnaletnich.
Pry kancy akcyi jany pačali ŭskidvać ruki ŭ nacysckim pryvitańni i kryčać udzielnikam akcyi «Valicie adsiul» (tolki heta kazałasia brudnaj łajankaj), a potym paleźli cieraz parenčy ŭ Alaksandraŭski skvier.
18:20
Akcyja praciahvajecca, nichto razhaniać nie źbirajecca, vidać - pakolki zaŭtra ŭ Bruseli budzie prymacca rašeńnie nakont padaŭžeńnia/maratoryja na sankcyi ŭ dačynieńni da biełaruskich čynoŭnikaŭ
18:10
Zaraz na płoščy kala 40 čałaviek, milicyja nie ŭmiešvajecca. Da akcyi dałučylisia mastak Aleś Puškin i sustaršynia arhkamiteta BCHD Vital Rymašeŭski.
Udzielniki akcyi hukajuć «Žyvie Biełaruś» i «Svabodu palitviaźniam». Uźniaŭsia adzin bieł-čyrvona-bieły ściah, jaho prynieśli aktyvisty «Jeŭrapiejskaj Biełarusi».
18:03
Pierad pačatkam akcyi niechta na płoščy zapuściŭ fiejervierk.
Zaraz na płoščy — kala 30 čałaviek. Siarod ich palityki i hramadskija dziejačy — eks-staršynia Partyi BNF Lavon Barščeŭski, staršynia Abjadnanaj hramadzianskaj partyi Anatol Labiedźka, aktyvist inicyjatyvy «Jeŭrapiejskaja Biełaruś» Jaŭhien Afnahiel, maładafrontaŭcy Nasta Pałažanka i Źmicier Daškievič, kiraŭnik arhkamiteta ruchu «Razam» Viačasłaŭ Siŭčyk.
Ludzi trymajuć raściažku: «My pomnim», partrety źnikłych — Viktara Hančara, Anatola Krasoŭskaha, Juryja Zacharanki, Dźmitryja Zavadskaha, a taksama siońniašnich palitviaźniaŭ: vaŭkavyscaŭ Mikałaja Aŭtuchoviča i Juryja Asipienki, maładafrontaŭca Arcioma Dubskaha, biźniesmiena Andreja Bandarenki.
***
Užo čaćviorty hod kožny miesiac 16‑ha dnia prachodzić akcyja ŭ padtrymku palitviaźniaŭ i siemjaŭ źnikłych. U roznych haradach Biełarusi i zamiežža ludzi vychodziać na vulicy sa ściahami i partretami, kab pryzvać biełaruskija ŭłady da spynieńnia represij i da palityčnych źmienaŭ u krainie.
16 listapada akcyja «Salidarnaści» maje na mecie nahadać hramadstvu, što ŭ Biełarusi ŭsio jašče jość viaźni sumleńnia:
heta vaŭkavyskija pradprymalniki Mikałaj Aŭtuchovič i Uładzimir Asipienka, a taksama aktyvist «Maładoha Frontu» Arciom Dubski.
Taksama ŭ Biełarusi pa‑raniejšamu amal nie rasśledujucca spravy ab źniknieńni ŭ 1999‑2000 hadach apazicyjnych lideraŭ Viktara Hančara, Juryja Zacharanki, Anatola Krasoŭskaha i žurnalista Dźmitryja Zavadskaha. U vykradańni hetych ludziej mižnarodnaja supolnaść padazraje vysokapastaŭlenych biełaruskich čynoŭnikaŭ.
